Presidenti i Shteteve të Bashkuara, Donald Trump, ka uruar Kosovën për 18-vjetorin e pavarësisë, duke rikonfirmuar mbështetjen e fortë të SHBA-së për sovranitetin dhe integritetin territorial të saj.
Në letrën drejtuar presidentes Vjosa Osmani, Trump shprehu gatishmërinë për zgjerimin e partneritetit mes dy vendeve, veçanërisht përmes rritjes së tregtisë dhe investimeve, me synim forcimin e prosperitetit të përbashkët. Ai theksoi gjithashtu se SHBA-ja është e gatshme të punojë krah Kosovës për avancimin e paqes dhe stabilitetit.
Kosova u përgëzua edhe për pjesëmarrjen në themelimin e “Bordit të Paqes” dhe për mbështetjen ndaj përpjekjeve amerikane për zgjidhjen e konflikteve globale, përfshirë Ukrainën dhe Gazën.
Që nga viti 1998, Shtetet e Bashkuara kanë ndarë mbi 2 miliardë dollarë ndihmë për Kosovën, ndërsa udhëheqësit kosovarë e kanë cilësuar vazhdimisht Amerikën si partnerin më të rëndësishëm strategjik.
Megjithatë, marrëdhëniet mes dy vendeve kanë njohur herë pas here tensione, kryesisht për shkak të disa veprimeve të qeverisë së mëparshme lidhur me minoritetin serb, të cilat u konsideruan të njëanshme nga zyrtarët amerikanë. Si pasojë, vitin e kaluar SHBA-ja pezulloi nisjen e Dialogut Strategjik me Kosovën.
Së fundmi, Ambasada amerikane në Prishtinë ka sinjalizuar gatishmërinë për rinisjen e këtij procesi dhe për bashkëpunim me kryeministrin Albin Kurti, i cili ka nisur mandatin e tij të tretë.
SHBA-ja ishte ndër vendet e para që njohu pavarësinë e Kosovës më 17 shkurt 2008. Aktualisht, shtetësia e saj njihet nga 121 vende, ndërsa sfidë mbetet mosnjohja nga katër shtete të NATO-s dhe pesë të Bashkimit Europian.
