Presidenti amerikan Donald Trump ka kërkuar një hetim për atë që e quajti “sabotim trefish” gjatë vizitës së tij në Asamblenë e Përgjithshme të OKB-së të mërkurën.
Në një postim në rrjetet sociale, ai iu referua tre episodeve: një shkallë lëvizëse që u ndal papritur në momentin që ai dhe Zonja e Parë Melania Trump po hipnin mbi të, një defekt në teleprompter gjatë fjalimit të tij, si dhe një problem me sistemin e zërit në sallë.
Një zyrtar i OKB-së tha se sistemi i zërit ishte projektuar që pjesëmarrësit të dëgjonin fjalimet e përkthyera përmes kufjeve.
OKB-ja më herët kishte sqaruar se mekanizmi i sigurisë i shkallëve mund të jetë aktivizuar nga kameramani i Trump, i cili po ecte mbrapsht mbi shkallë duke filmuar, ndërsa teleprompteri ishte pjesë e pajisjeve të delegacionit amerikan.
Trump i kritikoi incidentet në platformën Truth Social dhe tha se do t’i dërgojë një letër Sekretarit të Përgjithshëm të OKB-së, António Guterres, duke kërkuar një hetim të menjëhershëm.
“Një TURP i VËRTETË ndodhi dje në Kombet e Bashkuara – Jo një, jo dy, por tre ngjarje shumë të errëta!” shkroi ai.
“Kjo nuk ishte rastësi, kjo ishte sabotim trefish në OKB. Duhet të turpërohen.”
Trump gjithashtu bëri thirrje për arrestimin e personave përgjegjës për incidentin me shkallët, duke iu referuar një artikulli të Times që shkruante se punonjës të OKB-së ishin tallur duke thënë se “fikën” shkallët.
“Kjo ishte absolutisht sabotim… Të gjitha pamjet e sigurisë te shkallët duhet të ruhen, sidomos ajo e butonit të emergjencës. Shërbimi Sekret është i përfshirë,” shtoi ai.
Ambasadori i SHBA-së në OKB, Mike Waltz, mbështeti kërkesën e presidentit për një hetim zyrtar, duke i quajtur incidentet “të papranueshme”.
“Shtetet e Bashkuara nuk do të tolerojnë kërcënime ndaj sigurisë ose dinjitetit tonë në forumet ndërkombëtare. Presim bashkëpunim të shpejtë dhe veprim vendimtar,” shkroi ai në X.
Sekretarja e shtypit e Shtëpisë së Bardhë, Karoline Leavitt, tha se ekzistojnë shqetësime se dikush e ndali qëllimisht shkallën lëvizëse.
“Nëse dikush në OKB ndali qëllimisht shkallët pikërisht kur Presidenti dhe Zonja e Parë po hipnin, duhet të pushohet menjëherë nga puna dhe të hetohet,” shkroi ajo në X.
Zëdhënësi i Guterres, Stéphane Dujarric, tha se kameramani i Trump “mund të ketë aktivizuar pa dashur mekanizmin e sigurisë” teksa filmonte çiftin.
Pas incidentit me shkallët, Trump hasi në vështirësi të tjera teknike kur tha se teleprompteri nuk funksiononte – edhe pse ai u rikthye në funksion nga fundi i fjalimit.
“Vetëm mund të them se kushdo që po e operon këtë teleprompter është në telashe të mëdha,” tha ai.
Një zyrtar i OKB-së më vonë i tha BBC-së se teleprompteri po operohej nga Shtëpia e Bardhë, e cila kishte sjellë laptopët e saj dhe i kishte lidhur me sistemin e OKB-së.
Trump gjithashtu përmendi problemet me zërin, duke thënë: “Zëri ishte krejtësisht i fikur në sallë. Udhëheqësit botërorë, përveç nëse përdornin kufjet e përkthimit, nuk mund të dëgjonin asgjë.”
Në përgjigje të komenteve të Trump, një zyrtar i OKB-së tha: “Sistemi i zërit është projektuar që njerëzit në vendet e tyre të dëgjojnë fjalimet e përkthyera në gjashtë gjuhë të ndryshme përmes kufjeve.”
