Uashington, 6 Gusht 2025 – Presidenti Donald Trump ka firmosur një urdhër ekzekutiv që vendos një tarifë shtesë prej 25% ndaj Indisë, për shkak të blerjeve të saj të vazhdueshme të naftës nga Rusia. Me këtë vendim, tarifat totale që SHBA ka vendosur ndaj Indisë arrijnë në 50%, duke shkaktuar tronditje në marrëdhëniet tregtare mes dy vendeve aleate.
Tarifat e reja hyjnë në fuqi 21 ditë pas nënshkrimit të urdhrit, duke lënë hapësirë për negociata të mundshme mes Nju Delhit dhe Uashingtonit. India, e cila ishte shndërruar në një alternativë për kompanitë amerikane që kërkonin të largoheshin nga Kina, mund të përballet me pasoja të rënda ekonomike.
Ndërkohë, edhe pse edhe Kina blen naftë nga Rusia, ajo nuk është përfshirë në këtë urdhër të ri. Trump ka vendosur tashmë tarifa prej 30% ndaj mallrave kineze, duke ruajtur një qasje më të kujdesshme ndaj Pekinit.
“Do të shohim çfarë do të ndodhë,” u shpreh Trump, duke lënë të hapur mundësinë e negociatave për tarifat, në funksion edhe të përpjekjeve të administratës së tij për të ndërprerë luftën në Ukrainë.
India nuk i është bashkuar sanksioneve perëndimore ndaj Rusisë, duke ruajtur një qëndrim neutral në luftën në Ukrainë dhe duke theksuar vazhdimisht dëshirën për paqe. Megjithatë, qëndrimi i saj po përballet me presion të shtuar nga SHBA.
Sipas të dhënave të Zyrës së Statistikave të SHBA, në vitin 2024, Amerika kishte një deficit tregtar prej 45.8 miliardë dollarësh me Indinë – një tjetër faktor që mund të ketë ndikuar në vendimin e presidentit republikan.
Ky veprim pritet të ketë jehonë të gjerë, jo vetëm për ekonominë indiane, por edhe për aleancat globale dhe balancën e fuqisë në Azi.
