Prokuroria e Civitavecchias ka nisur një hetim paraprak ndaj babait të Riccardo Boni, adoleshentit 17-vjeçar që humbi jetën tragjikisht javën e kaluar në Montalto di Castro, pasi u mbulua nga rëra në një gropë që e kishte hapur vetë në plazh. Organi i akuzës ka hapur një dosje për vrasje nga pakujdesia, një akuzë që për momentin është në fazë verifikimi dhe që synon të hetojë çdo lloj mosveprimi të mundshëm nga ana e prindit.
Sipas raportimeve, babai i Riccardos ndodhej në një distancë rreth dy metra nga vendi ku ndodhi tragjedia, dhe vetëm pas ndërhyrjes së vëllait të vogël të viktimës, u bë e mundur gjetja e trupit të Riccardos – fatkeqësisht, kur tashmë ishte shumë vonë.
Duke qenë se viktima ishte i mitur, ligji italian parashikon që në raste të tilla përgjegjësia për çfarë ndodh bie mbi prindërit. Autoritetet janë duke kryer hetimet e nevojshme për të sqaruar rrethanat e ngjarjes dhe përgjegjësinë eventuale të të dyshuarit. Ndërkohë, nuk përjashtohet mundësia që babai i Riccardos të kërkojë të dëgjohet nga prokurorët për të sqaruar pozicionin e tij.
Ngjarja ka tronditur opinionin publik italian dhe ka rikthyer në vëmendje rëndësinë e mbikëqyrjes së fëmijëve në mjedise të hapura si plazhet, ku shpesh një çast pakujdesie mund të sjellë pasoja tragjike.
