Një stuhi e fuqishme dëbore në Parkun Kombëtar Torres del Paine në Patagoninë jugore të Kilit ka shkaktuar vdekjen e pesë turistëve, ndërsa katër të tjerë që rezultonin të zhdukur janë gjetur gjallë. Viktimat janë dy shtetas meksikanë, dy gjermanë dhe një britanik, konfirmoi José Ruiz Pivcevic, delegati presidencial i rajonit të Magallanes. Autoritetet aktualisht po punojnë për të nxjerrë trupat nga zona e vështirë malore.
Presidenti kilian Gabriel Boric shprehu ngushëllimet për familjet e viktimave, duke siguruar se institucionet e vendit po japin të gjithë mbështetjen e nevojshme.
Rreth 24 ekipe shpëtimi, përfshirë policinë kombëtare dhe ushtrinë, janë dislokuar në zonë, ndërsa operacionet po vështirësohen nga kushtet ekstreme të motit me reshje të dendura dëbore dhe erëra që kanë arritur deri në 190 km/h. Pjesë të parkut janë mbyllur për shkak të rrezikut.
Autoritetet thanë se turistët po udhëtonin pa guidë, ndërsa kryebashkiakja e Torres del Paine, Anahí Cárdenas, e përshkroi itinerarin malor si “kompleks”, duke shtuar se moti ekstrem ka qenë shkaku kryesor i tragjedisë. Turistët ishin nisur drejt kampit Los Perros, një zonë që kërkon katër deri në pesë orë ecje nga pika më e afërt e aksesit me automjet.
Zyra e Jashtme britanike konfirmoi se është në kontakt me autoritetet lokale.
Parku Kombëtar Torres del Paine, një nga mrekullitë natyrore të botës i njohur për akullnajat, liqenet në ngjyrë turke, majat gjigante granitore dhe biodiversitetin unik, është shpallur Rezervat e Biosferës nga UNESCO, duke tërhequr mijëra vizitorë çdo vit.
