Studiuesi Auron Tare ka reaguar ashpër pas incidentit ku një tifoz polak kreu akte të turpshme ndaj bustit të Heroit Kombëtar, Gjergj Kastrioti Skënderbeu, në sheshin “Skënderbej”.
Në një reagim në rrjetet sociale, Tare ka shprehur shqetësimin për trajtimin e tifozëve shqiptarë që mbrojtën nderin e Shqipërisë nga veprimet e huliganëve polakë. Ai ka theksuar se në asnjë vend të botës një ngjarje e tillë nuk do të kalonte pa pasojat e duhura, duke kërkuar që tifozët që reaguan të falënderohen dhe të lirohen nga burgu.
Auron Tare shkruan: “Një grup huliganësh polakë i bëjnë sh*rrën Heroit Kombëtar të Shqiptarëve. Një grusht djemsh shqiptarë me zemër protestojnë dhe hedhin gurë kundër tyre. Policia Shqiptare i fut brenda djemtë shqiptarë dhe i mban në burg me akuzë për veprime të dhunshme.” Ai gjithashtu shton se ky incident është një ofendim kombëtar dhe duhet të shihet si një rast për të mbrojtur dinjitetin e Shqipërisë, jo për të dënuar ata që u përpoqën të mbrojnë nderin e vendit.
Tare thekson se, nëse ngjarja do të kishte ndodhur në një vend tjetër të Europës, reagimi do të ishte shumë më i fuqishëm. Ai kërkon që shqiptarët të tregojnë respekt për heronjtë e tyre dhe të mos heshtin për ngjarje që cenojnë nderin kombëtar.
“Ata djem duhen lëshuar dhe duhen falënderuar për atë që bënë në emër të shqiptarëve,” përfundon Tare në reagimin e tij.
Kjo ngjarje ka nxitur debate të shumta për respektin ndaj figurës së Skënderbeut dhe reagimin institucional ndaj situatave që përfshijnë krenarinë kombëtare.
