29 Gusht – Kryeministri Edi Rama ka reaguar pas thirrjes së Këshillit të Lartë Gjyqësor (KLGJ), i cili kritikoi gjuhën e përdorur prej tij ndaj gjyqtarëve, duke e cilësuar si “minim të pavarësisë së gjyqësorit”.
Rama e cilëson “skandaloze” disa vendime të gjyqtarëve që, sipas tij, kanë mbrojtur zaptuesit e hapësirave publike dhe akuzon KLGJ se ka harruar rolin e vet themelor.
“KLGJ ka harruar se si instancë e lartë e vetëqeverisjes së gjyqësorit, ka jo vetëm të drejtën, por edhe detyrën të marrë seriozisht shqetësimet e palëve të cënuara nga vendime qorre të gjykatësve, të cilat janë të ububushme për nga mungesa e ndjeshmërisë ndaj interesit publik,” shkruan ai.
Sa i përket thirrjes së KLGJ për t’iu drejtuar gjykatave më të larta, Rama thekson se në çdo rast publik i ka njoftuar qytetarët se do të përdorë pikërisht KLGJ dhe ILD si institucionet përkatëse.
Në fund, kryeministri u kërkon anëtarëve të KLGJ-së të mos harxhojnë kohë për të gjykuar mënyrën se si ai bën punën, por të përqendrohen te cilësia e drejtësisë.
