Një valë dorëheqjesh ka përfshirë sot disa bashki të vendit, si pjesë e një procesi të koordinuar ristrukturimi të pushtetit vendor, i kërkuar drejtpërdrejt nga kryeministri Edi Rama. Burime nga terreni dhe raportime nga mediat kryesore bëjnë të ditur se dorëheqjet kanë ndodhur në Elbasan, Librazhd, Gjirokastër, Durrës, Fier, Vlorë, Korçë dhe Kolonjë, ndërsa pritet që procesi të zgjerohet edhe në bashki të tjera në ditët në vijim.
Në Elbasan dhe Librazhd kanë dhënë dorëheqje administratorët e njësive administrative dhe disa nga nënkryetarët e bashkive, pas një analize të brendshme të performancës së tyre. Lëvizjet janë bërë me kërkesë të strukturave qendrore të Partisë Socialiste dhe janë konsideruar pjesë e “riformatimit të thellë të pushtetit vendor”.
Në Gjirokastër, dorëheqjet kanë qenë më të shumta. Sipas burimeve nga Bashkia, shtatë administratorë të njësive administrative kanë dhënë dorëheqjen njëherësh, duke e konsideruar këtë një sinjal të qartë se qeveria po ndërhyn në mënyrë të strukturuar për të ndryshuar qasjen e qeverisjes lokale.
Në juglindje të vendit, në qarkun e Korçës, janë raportuar dorëheqje të gjashtë kryetarëve të njësive administrative në bashkinë Korçë, si dhe tre dorëheqje të ngjashme në Kolonjë. Procesi thuhet se do të shtrihet edhe në Maliq, Devoll dhe Pogradec.
Në Durrës dhe Fier, situata ka marrë përmasa më të gjera. Në Durrës, të gjithë drejtuesit e drejtorive të bashkisë dhe një pjesë e konsiderueshme e kryetarëve të njësive administrative janë dorëhequr pas një ultimatumi të prerë nga kryeministri. Edhe në Fier ka pasur dorëheqje të drejtuesve të nivelit të mesëm në administratën vendore.
Në Vlorë, disa nga drejtorët kryesorë të bashkisë kanë dorëzuar dorëheqjet e tyre, në një proces që është në vijim e sipër dhe që pritet të thellohet në ditët në vijim.
Të gjitha këto lëvizje po ndodhin si pjesë e një “spastrim teknik” të nisur nga Rama, i cili ka paralajmëruar publikisht ristrukturime në të gjitha ato bashki ku performanca është cilësuar si e dobët, ku ka mungesë kontaktit me qytetarët apo ku projektet zhvillimore nuk janë realizuar sipas pritshmërive. Në daljet e fundit publike, Rama ka theksuar se “nuk ka më vend për komoditet në pushtetin vendor” dhe se “kush nuk punon, ikën”.
Kjo ndërhyrje në administratën lokale vjen në një moment kur qeveria është nën presion për të përmirësuar transparencën dhe efikasitetin e qeverisjes vendore, veçanërisht në kontekstin e negociatave për anëtarësimin në Bashkimin Europian. Burime nga Partia Socialiste konfirmojnë se kjo është vetëm faza e parë e një vale të gjerë ndryshimesh që do të përfshijë bashki të tjera në javët në vijim.
Në ditët që pasojnë priten emërime të reja dhe një analizë më e detajuar e përgjegjësive individuale në secilën bashki ku janë dhënë dorëheqjet.
