Mbretëria e Tajlandës ka shpallur zyrtarisht macet vendase si simbol kombëtar, duke u dhënë status të veçantë pesë racave autoktone që përbëjnë një pjesë të pandarë të identitetit kulturor të vendit. Vendimi, i miratuar nga kabineti qeveritar pas rekomandimit të Komitetit për Identitetin Kombëtar, e cilëson trashëgiminë e maceve thai si të veçantë dhe të lidhur ngushtë me historinë e gjatë e traditat e mbretërisë.
Sipas njoftimeve zyrtare, ky status synon të mbrojë dhe të promovojë racat vendase, të cilat janë përmendur edhe në dorëshkrimet e lashta “Tamra Maew”, ku macet përshkruheshin si sjellëse fati, begatie dhe harmonie.
Pesë racat e shpallura simbole kombëtare
- Suphallak (macja e bakrit) – e njohur për mantelin me ngjyrë bronzi, e lidhur tradicionalisht me fatin e mirë.
- Korat – me lesh gri-blu dhe sy jeshilë, simbol i mbarësisë dhe mirëqenies.
- Wichien Maat – racë e lashtë e Siamit, e njohur për elegancën dhe inteligjencën.
- Konja – macja me gëzof të zi, që në kulturën thai sjell fat dhe nuk bart paragjykime negative.
- Khao Manee – “macja e gurit të bardhë”, shpesh me sy shumëngjyrësh, e rrallë dhe e çmuar.
Arsyet e vendimit
Autoritetet theksojnë se ky hap synon ruajtjen e biodiversitetit të racave vendase, forcimin e identitetit kulturor dhe nxitjen e turizmit përmes promovimit të maceve si pjesë e trashëgimisë kombëtare.
Njëkohësisht, vendimi pritet të ndihmojë në parandalimin e trafikimit dhe shitjeve të paligjshme të këtyre racave të rralla, duke ngritur standardet e mbarështimit dhe mbrojtjes.
Thailandia është tashmë vendi i parë në botë që u jep maceve një status të tillë zyrtar, duke i shndërruar ato në pjesë të identitetit kombëtar dhe në një aset kulturor e turistik me rëndësi të veçantë.
