Avokatët e Hashim Thaçit kanë kërkuar lirimin e menjëhershëm të ish-presidentit të Kosovës nga Dhomat e Specializuara në Hagë, duke paraqitur një argument të fortë: vetë Thaçi ka qenë ndër mbështetësit kryesorë të krijimit të kësaj gjykate.
Sipas mbrojtjes, roli i tij në miratimin e Gjykatës Speciale duhet të merret si rrethanë lehtësuese, pasi ai ka kontribuar që drejtësia ndërkombëtare të hetojë akuzat ndaj UÇK-së.
Në dosjen përfundimtare, avokatët pretendojnë se prokuroria nuk ka arritur të provojë përtej çdo dyshimi të arsyeshëm përfshirjen e Thaçit në krime lufte apo krime kundër njerëzimit.
Ata kundërshtojnë gjithashtu pretendimet për ngjarjet në Qirez, duke theksuar se dëshmitë tregojnë mungesë keqtrajtimi dhe përfshirjeje direkte nga ana e Thaçit.
Në të njëjtin proces, të akuzuar janë edhe Kadri Veseli, Jakup Krasniqi dhe Rexhep Selimi për rolin e tyre gjatë luftës së viteve 1998–2000.
Mbrojtja kërkon që gjykata ta shpallë të pafajshëm Thaçin dhe ta lirojë menjëherë, ndërsa vendimi pritet të shpallet në javët në vijim.
Një proces që mund të ndryshojë narrativën e luftës dhe drejtësisë për Kosovën po hyn në momentet vendimtare.
