Të paktën 95 njerëz kanë vdekur dhe 130 janë lënduar nga një tërmet i fuqishëm që e goditi rrafshnaltën e Tibetit të martën në mëngjes, raportojnë mediat shtetërore kineze.
Shumë njerëz të tjerë kanë mbetur nën rrënojat e shtëpive dhe ndërtesave në këtë rajon në perëndim të Kinës.
Mediat shtetërore raportuan se 1.000 shtëpi janë dëmtuar në Tibet.
Tërmeti u ndje edhe në Nepalin fqinj dhe në pjesë të Indisë.
Shërbimi Gjeologjik i SHBA-së njoftoi se tërmeti ishte me magnitudë prej 7.1 dhe goditi në një thellësi prej rreth 10 kilometrash. Kina e regjistroi tërmetin si 6.8.
Epiqendra e tërmetit ishte rreth 75 kilometra në verilindje të Malit Everest, i cili shtrihet në kufirin mes Kinës dhe Nepalit. Kjo zonë është sizmologjikisht aktive, pasi aty takohen pllakat nëntokësore të Indisë dhe Eurazisë.
View this post on Instagram
Rreth 50 lëkundje u ndjene në tri orët pas tërmetit, dhe zona turistike e Malit Everest në anën kineze u mbyll si pasojë.
Rreth 1.500 zjarrfikës dhe shpëtimtarë janë dërguar për t’i kërkuar njerëzit e ngecur nën rrënoja, sipas Ministrisë së Menaxhimit të Emergjencave. Gjithashtu, 200 ushtarë iu bashkuan operacionit të kërkimit, raportojnë mediat shtetërore.
Lideri i Kinës, Xi Jinping, bëri thirrje për përpjekje të gjithanshme për shpëtimin e njerëzve, minimizimin e viktimave dhe sistemimin e personave që kanë humbur shtëpitë e tyre.
