Një ngjarje e pazakontë ka ndodhur rreth orës 11:30 në lagjen “Vasil Shanto” në Shkodër.
Një shtetas ende i paidentifikuar, i cili lëvizte me motomjet, është ndalur përpara një argjendarie dhe ka tentuar të hyjë brenda me skafandër në kokë. Pronari i argjendarisë i ka kërkuar që ta hiqte, por ai ka refuzuar dhe është larguar me vrap, duke lënë edhe motomjetin në vend.
Dyshohet se jashtë ambienteve të argjendarisë, ky shtetas ka drejtuar një armë zjarri ndaj pronarit, për të mos e ndjekur.
Policia mbërriti menjëherë në vendngjarje dhe po vijon kontrollet në zonë për identifikimin dhe kapjen e autorit.
Grupi hetimor, në bashkëpunim me Prokurorinë, po punon për zbardhjen dhe dokumentimin ligjor të ngjarjes.
