Kryetari i Grupit Parlamentar të Partisë Socialiste, Taulant Balla ka vijuar takimet me strukturat e partisë në kryeqytet, në kuadër të fushatës për rienergjizimin e PS-së dhe përkrahjen e projektit politik të Tiranës Europiane 2030.
Në një aktivitet të zhvilluar pasditen e së dielës me anëtarët dhe mbështetësit e PS-së në Njësinë 5 të Tiranës, Balla, i caktuar për të ndihmuar fushatën e Ogerta Manastirliut, theksoi rëndësinë e angazhimit të përbashkët për arritjen e objektivave politike të partisë në kryeqytet dhe në rang vendi.
“#Tirana2030 🌹 për #Shqipëria2030 🇦🇱🇪🇺. Vijuam sot pasdite punën për rienergjizimin e strukturave të PS me takimet me anëtarë dhe mbështetës të Njësisë 5, me angazhimin e përbashkët të kryetares që i duhet Tiranës europiane, Ogerta Manastirliu,” – shkroi Balla në një postim në rrjetet sociale.
Ky takim është pjesë e nismës së Partisë Socialiste për të forcuar organizimin në bazë, si dhe për të rritur komunikimin me qytetarët në pritje të zgjedhjeve në kryeqytet.
