Një sulm i madh rus gjatë natës ka goditur kryeqytetin ukrainas, Kievin, duke shkaktuar të paktën dy viktima dhe 16 të plagosur, njoftoi presidenti Volodymyr Zelensky.
Sulmi përfshiu 18 raketa dhe rreth 400 dronë, të cilët synuan kryesisht kryeqytetin. Autoritetet në Kiev raportuan se rrënojat e dronëve kanë dëmtuar çatinë e një ndërtese banimi në lagjen qendrore Shevchenkivskyi dhe se në qytet janë regjistruar zjarre të shumta.
Banorët kaluan tre orë pa gjumë, ndërsa mbrojtja ajrore e qytetit ishte në gatishmëri për të neutralizuar sulmet e shumta. Shpërthime të fuqishme tronditën qiellin e natës dhe pamjet në rrjetet sociale tregojnë skena të shumta shpërthimesh.
Ky sulm pason një tjetër sulm masiv javën e kaluar, kur Rusia përdori 728 dronë dhe 13 raketa balistike dhe cruise për të goditur qytete në të gjithë Ukrainën.
Policia e Kievit njoftoi se goditjet e dronëve kanë prekur tetë rajone të qytetit, ku janë dëmtuar ndërtesa banimi, automjete, magazina dhe objekte të tjera.
Ministri i Brendshëm, Ihor Klymenko, konfirmoi vdekjen e një gruaje 68-vjeçare dhe një polici 22-vjeçar në një stacion metroje.
Kryetari i Bashkisë së Kievit, Vitaliy Klitschko, bëri me dije se një qendër shëndetësore në lagjen Podilsky është dëmtuar rëndë, pothuajse e shkatërruar plotësisht.
Banorëve iu kërkua të qëndrojnë në strehë deri në heqjen e alarmit dhe të mbyllin dritaret për shkak të tymit të dendur në qytet.
Mbrojtja ajrore ukrainase raportoi kërcënime nga sulme të tjera me dronë në disa rajone të tjera të vendit, por nuk pati informacion të menjëhershëm për viktima jashtë Kievit.
Forcat ushtarake ruse nuk kanë komentuar ende për këtë sulm të fundit.
Ndërkohë, shërbimi emergjent i Ukrainës njoftoi se tre persona humbën jetën në një sulm ajror rus në qytetin Kostiantynivka, pranë vijës së frontit në lindje të vendit.
Presidenti Zelensky e dënoi sulmin duke e cilësuar si “terrorizëm të shtuar” nga Rusia, dhe kërkoi nga partnerët ndërkombëtarë që të përshpejtojnë sanksionet dhe të rrisin ndihmën ushtarake për Ukrainën.
Ai njoftoi se do të diskutohet financimi shtesë për prodhimin e dronëve interceptues dhe pajisjeve të mbrojtjes ajrore.
Ky sulm i fundit tregon se shanset për një zgjidhje diplomatike janë shumë të vogla, ndërsa liderët botërorë mbajnë një qëndrim të ashpër ndaj Rusisë.
Në Romë pritet të mbahet një konferencë dyditore për rindërtimin e Ukrainës, ku do të diskutohet edhe mbrojtja e hapësirës ajrore të vendit.
Gjithashtu, sekretari amerikan i Shtetit, Marco Rubio, pritet të takohet me ministrin e Jashtëm rus, Sergei Lavrov, në një samit në Malajzi.
Lufta nisi me pushtimin e plotë rus të Ukrainës në shkurt 2022 dhe vazhdon të shkaktojë viktima dhe shkatërrime të mëdha.
