New York City po përballet me stuhinë më të fortë të dëborës ndër vite. Meteorologët paralajmërojnë se kulmi i stuhisë pritet nga mbrëmja e së premtes deri në orët e para të së shtunës, ndërsa në disa zona reshjet mund të arrijnë deri në rreth 30 cm borë.
Reshjet do të jenë intensive në periudha të caktuara, duke ulur ndjeshëm shikueshmërinë dhe duke e bërë qarkullimin rrugor tepër të rrezikshëm. I gjithë rajoni ndodhet nën Winter Storm Warning, ndërsa në kulmin e saj stuhia mund të sjellë 2–6 cm borë në orë, ritëm që vështirëson ndjeshëm punën e mjeteve të pastrimit të rrugëve.
Sipas parashikimeve, bora më e dendur do të nisë rreth orës 19:00 të premten dhe do të zgjasë deri rreth 01:00 pas mesnate, ndërsa reshje më të moderuara do të vazhdojnë edhe gjatë mëngjesit të së shtunës. Në Central Park pritet intensitet i lartë reshjesh, ndërsa zona si Hudson Valley, veriu i New Jersey-t dhe disa pjesë të Long Island mund të përfshihen nga breza edhe më të fortë dëbore.
Në total, New York City pritet 10–20 cm borë, por në zonat më të goditura sasia mund të shkojë në 20–30 cm. Temperaturat e ulëta do të bëjnë që reshjet të mbeten kryesisht borë, me përzierje shiu apo breshëri vetëm në zonat më jugore.
Autoritetet u bëjnë thirrje qytetarëve të shmangin udhëtimet e panevojshme, pasi temperaturat do të mbeten pranë zeros edhe pas përfundimit të reshjeve, duke sjellë pak shkrirje dhe rrezik ngricash.
