Një dietë e shëndetshme është më e fuqishme për përmirësimin e shëndetit të zorrëve sesa transplantet fekale, sipas një studimi të fundit të publikuar në revistën prestigjioze Nature.
Në kohën kur transplantet fekale po përjetojnë një interes të shtuar – për trajtimin e kancerit, ngadalësimin e plakjes dhe rikuperimin e mikrobiomës së zorrëve – shkencëtarët kanë zbuluar një zgjidhje shumë më të thjeshtë, të shëndetshme dhe… më pak të pakëndshme: një dietë e pasur me fibra.
“Ka shumë fokus te transplantet fekale për të rikthyer mikrobiomën e dëmtuar, por studimi ynë tregon se pa një dietë të shëndetshme, këto metoda nuk funksionojnë – dhe në fakt, dieta e shëndetshme vetë është më e efektshme,” u shpreh Joy Bergelson, zëvendëspresidente e Fondacionit Simons për Shkencat e Jetës.
Ushqimi më i rëndësishëm se ndërhyrjet ekstreme
Studiuesit nga Universiteti i Chicagos testuan efektet e dietës te minjtë që kishin marrë antibiotikë. Një grup u ushqye me një dietë të pastër, të pasur me fibra, ndërsa grupi tjetër ndoqi një model të stilit perëndimor – i lartë në yndyrë dhe i ulët në fibra.
Rezultatet ishin të qarta: mikrobioma e minjve me dietë të shëndetshme u rikuperua brenda një jave. Ndërsa te grupi tjetër, flora bakteriale mbeti e dëmtuar për javë të tëra, me një lloj të vetëm bakteresh që dominonte.
Edhe kur minjve me dietë të dobët iu aplikua transplant fekal, nuk u vu re rikuperim i dukshëm – përveç në rastet kur ata ushqeheshin mirë.
“Nëse nuk ofron ‘karburantin’ e duhur për mikrobet e mira – pra fibrat – ato thjesht nuk mbijetojnë,” tha bashkautorja Megan Kennedy.
Çfarë duhet të hamë për një zorrë të lumtur
Ekspertët rekomandojnë përfshirjen e ushqimeve të pasura me fibra si:
- Fruta të pyllit (manaferrat, boronicat)
- Fasule dhe thjerrëza
- Tërshërë
- Avokado
- Arra dhe fara
Këto ushqime ndihmojnë në ruajtjen e një ekuilibri të shëndetshëm të bakterieve të mira në zorrë, duke përmirësuar sistemin tretës dhe imunitetin.
Ky zbulim hedh dritë mbi faktin pse transplantet fekale kanë efekte të ndryshme nga personi në person – dhe thekson rëndësinë jetike të dietës në çdo trajtim të shëndetit të zorrëve.
