Një ekip shkencëtarësh nga Qendra Kombëtare Spanjolle për Kërkimin mbi Kancerin (CNIO) ka arritur një rezultat të rëndësishëm në luftën kundër një prej formave më agresive të kancerit: adenokarcinomës duktale të pankreasit, tumori më i zakonshëm dhe më vdekjeprurës i këtij organi.
Sipas studimit të publikuar në revistën shkencore PNAS (Proceedings of the National Academy of Sciences), një kombinim i tre barnave ka çuar në zhdukjen e plotë të tumoreve te modelet eksperimentale të minjve, për një periudhë deri në 200 ditë, pa shfaqur rezistencë ndaj trajtimit dhe pa efekte anësore të konsiderueshme.
Rezultatet janë komentuar nga profesori Mariano Barbacid, drejtues i ekipit të Onkologjisë Eksperimentale në CNIO, i cili thekson se për herë të parë është arritur një përgjigje e plotë, e qëndrueshme dhe me toksicitet të ulët kundër kancerit të pankreasit në modele eksperimentale.
Sipas tij, ky studim tregon se strategjia e terapive të kombinuara, që synojnë njëkohësisht disa mekanizma kyç të rritjes së qelizave kancerogjene, mund të ndryshojë rrënjësisht ecurinë e këtij tumori, i cili deri më tani ka treguar rezistencë të lartë ndaj trajtimeve tradicionale.
Megjithatë, studiuesit sqarojnë se terapia nuk është ende gati për testime klinike te njerëzit. Nevojiten studime shtesë për të garantuar sigurinë dhe efektivitetin përpara se të kalohet në fazën klinike.
Kanceri i pankreasit mbetet një nga sëmundjet onkologjike me prognozën më të keqe, me një normë mbijetese pesëvjeçare nën 10 për qind, kryesisht për shkak të diagnostikimit të vonë dhe mungesës së terapive efektive. Në këtë kontekst, gjetjet e fundit përfaqësojnë një hap të rëndësishëm shkencor dhe një dritare shprese për trajtime më efikase në të ardhmen.
