Përmbytjet më vdekjeprurëse në historinë moderne të Spanjës kanë vrarë të paktën 214 njerëz dhe dhjetëra janë ende të zhdukur, katër ditë pasi shirat e rrëmbyeshëm përfshinë rajonin lindor të Valencias, tha kryeministri Pedro Sanchez.
Në një deklaratë televizive, Sanchez u shpreh se qeveria po dërgonte 5,000 trupa të tjera të ushtrisë për të ndihmuar me kërkimet dhe pastrimin, përveç 2,500 ushtarëve që po operojnë tashmë.
“Është operacioni më i madh i Forcave të Armatosura në Spanjë në kohë paqeje”, tha Sanchez. “Qeveria do të mobilizojë të gjitha burimet e nevojshme për aq kohë sa ato nevojiten.”
Autoritetet rajonale të Valencias thanë të shtunën në mbrëmje se numri i përgjithshëm i viktimave në rajon ishte 211, plus dy nga Castilla La Mancha dhe një në Andaluzi.
Tragjedia është tashmë katastrofa më e rëndë në Evropë për shkak të përmbytjeve që nga viti 1967, kur të paktën 500 njerëz humbën jetën në Portugali.
Shpresat për gjetjen e të mbijetuarve u rritën kur shpëtimtarët gjetën një grua të gjallë pas tre ditësh të bllokuar në një park makinash në Montcada, Valencia. Banorët shpërthyen në duartrokitje kur shefi i mbrojtjes civile Martin Perez njoftoi lajmin.
Vullnetarët u dyndën në qendrën e qytetit të Arteve dhe Shkencave të Valencias të shtunën për pastrimin e parë të koordinuar të organizuar nga autoritetet rajonale.
Në periferinë Picanya të Valencias, pronarja e dyqanit Emilia, 74 vjeç, i tha Reuters të shtunën: ” Ndjehemi të braktisur, ka shumë njerëz që kanë nevojë për ndihmë. Nuk është vetëm shtëpia ime, janë të gjitha shtëpitë. Po hedhim mobiljet, jemi duke hedhur çdo gjë.”
“Kur do të vijë ndihma për të pasur frigoriferë dhe lavatriçe? Sepse ne nuk mund të lajmë as rrobat tona dhe nuk mund të bëjmë as dush.”
Infermierja Maria Jose Gilabert, 52 vjeç, e cila gjithashtu jeton në Picanya, deklaroi: “Ne jemi të shkatërruar sepse nuk ka shumë dritë këtu për momentin, jo sepse ata nuk po vijnë për të ndihmuar, ata po vijnë nga e gjithë Spanja, por sepse do të kalojë shumë kohë para se kjo të bëhet sërish një zonë e banueshme”.
Stuhia shkaktoi një alarm të ri moti në Ishujt Balearik, Katalonjë dhe Valencia, ku shirat pritet të vazhdojnë edhe gjatë fundjavës.
Shkencëtarët thonë se ngjarjet ekstreme të motit po bëhen më të shpeshta në Evropë dhe gjetkë, për shkak të ndryshimeve klimatike. Meteorologët mendojnë se ngrohja e Mesdheut, e cila rrit avullimin e ujit, luan një rol kyç në krijimin e situatave me shira të rrëmbyeshëm./reuters
