Prokuroria e Posaçme, SPAK, sekuestroi sot telefonin e bashkëshortes së kryetarit të bashkisë së Tiranës, Erion Veliaj. Sekuestrimi është bërë me vendim të GJKKO.
Agjentët e BKH-së kanë pasur në dorë një vendim të Gjykatës së Posaçme për sekuestrimin e telefonit kur janë paraqitur mëngjesin e sotëm, 6 dhjetor, në banesën e Veliajt tek ‘Kodra e Diellit’ në Tiranë.
Një grup i agjentëve të BKH-së kanë shkuar në banesën e Veliajt tek ‘Kodra e Diellit’ në Tiranë për të sekuestruar celularin.
Telefoni i Ajola Xoxës është sekuestruar në kuadër të një hetimi pasuror të nisur disa muaj më parë nga prokurori Ols Dado.
Disa agjentë kanë shkuar edhe në selinë e galerisë ‘Harabel’ që ndodhet në zonën e ish-bllokut në Tiranë, ku kanë ushtruar kontrolle dhe kanë sekuestruar dokumente e materiale të ndryshme që kanë të bëjnë me hetimet e nisa në lidhje me pasurinë e Erion Veliajt dhe familjarëve të tij.
Ndërkohë, zyra e shtypit të Bashkisë Tiranë njofton se Veliaj ndodhet në Hamburg të Gjermanisë, për një vizitë dy ditore, gjatë së cilës është pritur në një takim edhe nga Kryebashkiaku i Parë i Hamburgut, Peter Tschentscher.
SPAK ka reaguar për lajmin e botuar për sekuestrimin e telefonit të Ajola Xoxës, bashkëshortes së kryetarit të Bashkisë Tiranë, Erion Veliaj.
Në reagimin zyrtar, SPAK thotë se janë ndërmarrë disa veprime hetimore, ndërsa hetimi është ende në faza paraprake.
“Prokuroria e Posaçme kundër Korrupsionit dhe Krimit të Organizuar informon se janë ndërmarrë disa veprime hetimore në kuadër të një procedimi penal.
Duke qenë se hetimi ndodhet ende në fazën paraprake nuk mund të publikojmë të dhëna apo informacion të mëtejshëm në këtë moment. Faleminderit për mirëkuptimin”, thuhet në reagimin e SPAK.
Prokuroria e Posaçme Kundër Korrupsionit dhe Krimit të Organizuar (SPAK) ka zhvilluar kontrolle në banesën e kryetarit të bashkisë së Tiranës, Erion Veliaj.
Mësohet se agjentët e BKH shkuan në orët e para të mëngjesit në banesën ku jeton kryebashkiaku.
Kujtojmë që kryetari i bashkisë së Tiranës, Erion Veliaj po hetohet nga SPAK për aferën e inceneratorëve, dosjen 5D, por edhe në hetim pasuror së bashku me familjen.
Në muajin maj ndaj Veliajt ka filluar procedimi penal dhe se SPAK ka kërkuar t’i vendoset në dispozicion çdo veprim bankar dhe çdo transaksion financiar nga kryebashkiaku, bashkëshortja e tij Ajola Xoxa, i vëllai Arbër Veliaj dhe nëna Shqiponjë Veliaj.
Më 30 prill, Kryetari i Bashkisë së Tiranës, Erion Veliaj u paraqit në Prokurorisë së Posaçme, ku për rreth 8 orë dëshmoi për aferën e inceneratorëve. Veliaj theksoi për mediat se ishte në SPAK si bashkëpunëtor dhe se gjatë marrjes në pyetje ishte ezauruar plotësisht çështja e inceneratorëve.
Ndërkohë që agjentët kanë shkuar në banesën e kryetarit të bashkisë, mësohet se ai nuk ndodhej aty, pasi është në një vizitë dy ditore në Hamburg të Gjermanisë.
