Presidenti i SHBA-së, Donald Trump, ka rikthyer në qendër të vëmendjes idenë e marrjes së Greenland-ës, duke deklaruar se “të gjitha opsionet janë në tryezë”, përfshirë edhe përdorimin e forcës. Shtëpia e Bardhë ka konfirmuar se po shqyrtohen alternativa ekonomike, politike dhe ushtarake — një zhvillim që, nëse do të materializohej, do të përbënte një krizë ekzistenciale për NATO-n, pasi do të ishte një sulm i një aleati ndaj një tjetri.
Trump e konsideron Groenlandën jetike për sigurinë kombëtare të SHBA-së, duke pretenduar (pa prova) se zona është e mbushur me anije ruse dhe kineze. Analistët thonë se, teorikisht, një operacion i shpejtë ushtarak do të ishte i realizueshëm për shkak të popullsisë së vogël (rreth 58 mijë banorë) dhe mungesës së një ushtrie vendase, ndërsa Denmark ka kapacitete të kufizuara për të mbrojtur një territor kaq të madh. Megjithatë, pasoja politike dhe ligjore do të ishin monumentale dhe në kundërshtim me të drejtën ndërkombëtare.
Një tjetër skenar i diskutuar është blerja e Groenlandës, ide që është hedhur edhe më parë nga SHBA (që në vitin 1946). Por Kopenhaga dhe Nuuk e kanë bërë të qartë se territori nuk është në shitje. Një marrëveshje e tillë do të kërkonte miratim nga Kongresi amerikan, dy të tretat e Senatit, si dhe dritën jeshile të Bashkimit Europian — një rrugë tepër e ndërlikuar politikisht dhe e kushtueshme financiarisht.
Opsioni më realist, sipas ekspertëve, mbetet një fushatë ndikimi: nxitje e pavarësisë së Groenlandës nga Danimarka, e ndjekur nga një partneritet i ngushtë me SHBA-në, në modelin e marrëveshjeve që Uashingtoni ka me shtete të Paqësorit. Sondazhet tregojnë se shumica e groenlandezëve favorizojnë pavarësinë, por nuk duan bashkim me SHBA-në, çka e bën çdo plan afatshkurtër të pasigurt.
Ndërkohë, SHBA tashmë ka prani ushtarake në veri të ishullit, në bazën Pituffik, e trashëguar që nga Lufta e Dytë Botërore. Por për analistët europianë, çdo përpjekje për “ta marrë” Groenlandën pa pëlqimin e popullit të saj do të thellonte përçarjen transatlantike dhe do të trondiste themelet e NATO-s.
