Deputeti Erion Braçe ka ngritur alarmin për një skemë të re mashtrimi financiar online që po funksionon përmes platformave XUEX dhe TXEX.
Sipas tij, në grupet e brendshme të Telegram-it, drejtuesit e XUEX kanë bllokuar çdo tërheqje parash nga anëtarët, duke e shndërruar skemën në një piramidë klasike mashtruese.
“Pas 48 orësh pa tërheqje, ‘Leo Smith’, i njohur si ‘Profesori’ apo ‘Roboti’, ka konfirmuar në një mbledhje online se paratë nuk dalin më nga llogaritë e përdoruesve. Kjo është e njëjta skemë me TXEX, që prej ditësh ka bllokuar pagesat, sidomos në Divjakë dhe Lezhë”, shkruan Braçe.
Ai shton se çdo fjali në komunikimet e drejtuesve të këtyre platformave është provë se ato funksionojnë si skema piramidale dhe jo si bursa serioze, siç pretendohet.
Deputeti zbulon gjithashtu se edhe shqiptarë jashtë vendit kanë investuar në këtë “piramidë”, duke e quajtur situatën alarmante:
“Pas gjithë asaj që kaloi thuajse çdo familje në 1996-1997, besoja se nuk do kishte më shqiptarë që të binin në gropën e piramidave. Por ja që ndodhi sërish”.
Policia dhe institucionet financiare nuk kanë dhënë ende një reagim zyrtar për situatën.
