Një skandal i madh financiar ka tronditur Greqinë, pas zbulimit të një rrjeti mashtrimi me llogari bankare të rreme, që ka prekur fondet bujqësore të administruara nga Agjencia shtetërore OPEKEPE.
Vetëm një nga të dyshuarit në ishullin Kretë akuzohet se ka përvetësuar rreth 2.5 milionë euro, duke përdorur metoda të sofistikuara për të marrë subvencione të padrejta në emër të fermerëve.
Agjencia OPEKEPE është përgjegjëse për menaxhimin e mbi 3 miliardë euro subvencione çdo vit, që ndahen për rreth 680 mijë fermerë në të gjithë Greqinë, si pjesë e fondeve të Bashkimit Europian për zhvillimin bujqësor.
Zyrtarët grekë kanë pranuar se ky mashtrim mund të rrezikojë besimin e Brukselit dhe vazhdimësinë e financimeve europiane për sektorin bujqësor.
Kryeministri Kyriakos Mitsotakis reagoi ashpër ndaj skandalit, duke theksuar se qeveria nuk do të tolerojë asnjë formë abuzimi me fondet publike:
> “Cilado qoftë kostoja politike, përgjegjësit do të ndëshkohen. Transparenca dhe besimi janë thelbësorë për të ardhmen e fondeve europiane.”
Hetimet vazhdojnë në disa rajone të Greqisë, ndërsa autoritetet janë duke verifikuar qindra llogari bankare dhe aplikime të dyshimta për subvencione.
