Një skandal i rëndë ka shpërthyer në Nepal, ku dhjetëra persona akuzohen për mashtrim me siguracionet duke përdorur metoda ekstreme ndaj turistëve në malin Everest. Sipas mediave ndërkombëtare, autoritetet nepaleze kanë ngritur akuza ndaj 32 personave për krime të organizuara dhe shkelje kundër shtetit.
Hetimet kanë zbuluar një skemë të gjerë mashtrimi, ku guida dhe operatorë turistikë dyshohet se kanë helmuar ose sëmurur qëllimisht alpinistët, për të justifikuar ndërhyrje emergjente me helikopter dhe për të përfituar nga siguracionet.
Sipas të dhënave zyrtare, janë evidentuar të paktën 171 operacione shpëtimi të dyshuara si të rreme, nga një total prej mbi 1,200 fluturimesh charter. Përmes kësaj skeme, janë kërkuar miliona dollarë dëmshpërblime nga kompanitë e sigurimeve.
Në disa raste, hetuesit kanë zbuluar se të njëjtët turistë janë raportuar si të shpëtuar disa herë, në operacione të ndryshme, për të rritur përfitimet financiare. Në një rast konkret, katër turistë u transportuan me një fluturim të vetëm, por u raportuan si ndërhyrje të ndara për përfitime më të mëdha.
Autoritetet kanë arrestuar disa persona, ndërsa të tjerë janë shpallur në kërkim. Skandali ka tronditur industrinë e turizmit në Everest, duke ngritur shqetësime serioze për sigurinë e turistëve dhe abuzimet në sistemin e shpëtimit malor.
.
