Situata e krijuar nga përmbytjet vijon të jetë problematike në disa qarqe të vendit, me Durrës ndër zonat më të goditura pas daljes nga shtrati të Lumi Erzen.
Në të gjithë territorin e Bashkisë Durrës janë evakuuar 667 banorë, të cilët janë sistemuar kryesisht në Kavalishencën, shtëpia e pushimit e Ministrisë së Mbrojtjes, ndërsa mbi 300 persona në Sukth kanë gjetur strehim te familjarët. Sipas verifikimeve paraprake, 2.645 banesa rezultojnë me prezencë uji.
Çarja e argjinaturës së Erzenit ka përmbytur fshatrat Erzen dhe Fllakë, ndërsa rrezikon edhe zonën e Qerretit. Në këto territore, mbi 6 mijë hektarë tokë bujqësore ndodhen aktualisht nën ujë, me dëmet më të mëdha të evidentuara në Sukth.
Një përmirësim i lehtë është shënuar këtë të premte në Qarku i Vlorës, ku niveli i Lumi Vjosë ka rënë ndjeshëm pas uljes së reshjeve. Në pikën matëse të Memaliajt, niveli nga mbi 8 metra ka zbritur në 3.8 metra, çka pritet të reflektojë pozitivisht edhe në zonën e grykëderdhjes. Megjithatë, përmbytjet e së enjtes krijuan situatë të rëndë në fshatrat Bishan, Fitore dhe Novoselë, ku 45 familje u evakuuan.
Probleme serioze raportohen edhe në Qarku i Lezhës, ku mbi 4 mijë hektarë tokë bujqësore janë nën ujë. Çarja e argjinaturës së lumit Droja ka përmbytur zona si Sanxhak, Gjormë, Adriatik, Gorre dhe Patok në Kurbin, ndërsa në të gjithë qarkun numërohen 265 banesa me prezencë uji. Ndërkohë, në qytetin e Lezhës kanë nisur reshjet e dëborës, duke shtuar vështirësitë.
Situatë problematike paraqitet edhe në Qarku i Dibrës, ku aksi kombëtar Klos–Burrel është bllokuar pas shembjes së një kanali. Sasi të mëdha balte dhe inertesh kanë mbuluar rrugën, duke krijuar radhë automjetesh deri në 10 kilometra. Policia ndodhet në terren për normalizimin e qarkullimit.
Po ashtu, aksi Përmet – Dogana e Tre Urave vijon të mbetet i bllokuar prej mbrëmjes së kaluar, për shkak të çarjes së rrugës në hyrje të fshatit Petran.
Si pasojë e motit të keq dhe përmbytjeve, procesi mësimor është pezulluar në disa shkolla në qarqet Durrës, Gjirokastër, Vlorë dhe Fier.
Autoritetet vijojnë monitorimin e situatës, ndërsa ndërprerja e reshjeve pritet të sjellë një lehtësim gradual të gjendjes në zonat e përmbytura.
