Përgjatë muajit mars, disa prej faqeve zyrtare dhe email-eve të institucioneve shtetërore në vend shfaqën probleme, duke mos funksionuar rregullisht. Askush s’do ta mendonte se pas kësaj anomalie qëndronte një i mitur nga qyteti i Vlorës, i cili dyshohet se është me spektrin e autizmit.
15-vjeçari, që mesa duket qenka i prirur për hakerimin e ëeb-faqeve, futi në punë Policinë e Shtetit për të nisur hetimet për këto raste. Pas afro 1 muaj hetime, policia njofton se këtë të premte, në Vlorë është gjurmuar dhe vënë nën hetim një 15-vjeçar, i cili ka kryer hakerimin e faqeve të institucioneve shtetërore.
Sipas njoftimit zyrtar, i mituri nuk ka vjedhur të dhëna apo dokumente konfidenciale nga këto sisteme, por mbetet që hetimi të zbardhë se çfarë ka ndodhur. Në shtëpinë e të miturit, u sekuestruan edhe 6 pajisje, 5 laptopë dhe 1 dron.
Ekzaminimi i tyre do të nxjerrë në pah edhe se çfarë ka ndodhur në të vërtetë, ndërsa gjatë marrjes në pyetje, 15-vjeçari ka deklaruar se gjithçka e ka bërë për kureshtje dhe se nuk ka pasur asnjë qëllim për të vjedhur të dhëna nga sistemet kompjuterike.
Ndërkohë, mësohet se institucionet e sulmuara janë Parlamenti i Shqipërisë, SHISH, Bashkia e Vlorës dhe disa institucione të tjera me rëndësi. Grupi i hetimit ka ngritur dyshimet se 15-vjeçari të jetë shtyrë nga persona të tjerë për të ndërhyrë në serverat e institucioneve.
