Aktorja e njohur, e cila u lind më 2 prill të vitit 1934 në qytetin e Lushnjës, nisi hapat e saj të parë drejt karrierës artistike që e bëri një emër të paharrueshëm në historinë e filmit shqiptar.
Ditën e djeshme ajo festoi 91-vjetorin e lindjes, duke lënë pas një trashëgimi të çmuar në artin skenik.
Margarita Xhepa konsiderohet si një nga Zonjat e Mëdha të teatrit dhe filmit shqiptar, duke skalitur memorien e publikut shqiptar me role brilante që prej fillimit të saj në vitet ’60 e deri më tani.
Gjatë karrierës së saj të pasur, Margarita Xhepa interpretoi mbi 150 role në teatër dhe 32 role në kinematografi. Fillimisht, ajo u aktivizua në Estradën e Shtetit dhe më pas në Teatrin Popullor.
Disa prej personazheve që ajo interpretoi mjeshtërisht janë Zyraka te “Vitet e para” (1965), Shano te “Dimri i fundit” (1976), pianistja te “Koncert në vitin 1936” (1978) dhe Lena te “Tokë e përgjakur” (1976).
Përveç suksesit me veprat e shumta të dramaturgëve shqiptarë, Margarita Xhepa ka korrur sukses edhe në rolet e dramaturgjisë botërore, si Ofelia tek “Hamleti”, vajza e dytë tek “Mbreti Lir”, dadoja tek “Romeo e Zhuljeta”, mbretëresha Margaret tek “Rikardi III”, Ledi Milfordin në dramën “Intrigë dhe dashuri” (F. Shiler), Melën në dramën “Morali i zonjës Dulska” (G. Zapolska), Dafinën në dramatizimin e romanit “Lumi i vdekur” (J. Xoxa) dhe nënën në inskenimin e romanit të Kadaresë, “Kush e solli Doruntinën”.
Në vitin 1997, ajo interpretoi në filmin grek “Mirupafshim” (regjisor J. Koras, K. Vupuras). Filmi u laureua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa mori Çmimin e Nderit.
Në maj të vitit 2004, ajo u rikthye në skenën e Teatrit Kombëtar për të shkëlqyer në dramën “Streha e të harruarve”, një tjetër sukses në karrierën e saj 50-vjeçare.
Në vitin 2007, aktores iu dha “Çmimi i Karrierës” për rolin e Nadjezhnës në monodramën “Kënga e mjellmës” të Çehovit, ndërsa iu akordua gjithashtu edhe titulli “Artiste e Popullit”./ euronews
