Kryeministri Edi Rama ka deklaruar se Shqipëria nuk do ta zgjasë ndalimin njëvjeçar të platformës TikTok, pas asaj që ai e cilësoi si bashkëpunim konstruktiv me drejtues tç rrjetit social.
Sipas kreut të qeverisë reagimi i TikTok pas vendimit fillestar për ndalim ishte befasues pozitiv. Ai tha se kishte pritur përballje ose kundërpërgjigje agresive, por përkundrazi, drejtuesit e kompanisë treguan gatishmëri për të dëgjuar shqetësimet e qeverisë shqiptare dhe për të adresuar problemet e ngritura.
Shqipëria e ndaloi TikTok-un në mars 2025, pas rreth një viti negociatash lidhur me abuzimin online, përfshirë dy vetëvrasje të dyshuara si të lidhura me ngacmimet në platformë.
Ngjarja që e përshpejtoi vendimin ishte vrasja me thikë e 14-vjeçarit Martin Cani, pranë shkollës “Fan Noli” në Tiranë, pas një sherri që nisi në rrjetet sociale.
Ky ndalim u kundërshtua nga opozita dhe organizata të shoqërisë civile, të cilat e akuzuan qeverinë për censurë dhe kufizim të shprehjes. Rama pranoi se ndalimi nuk e zgjidhi dhunën në shkolla, por theksoi se shërbeu për të vendosur mekanizma sigurie që më parë mungonin.
Artikulli i plotë:
Shqipëria nuk do ta zgjasë ndalimin njëvjeçar të TikTok, tha kryeministri Edi Rama për POLITICO të mërkurën, ndërsa vlerësoi platformën për bashkëpunimin e saj.
Rama tha se pas takimeve konstruktive me platformën e mediave sociale, “jemi të kënaqur me rezultatin. E kemi bërë partneritetin dhe shpresoj që në javët ose muajt në vijim do t’ia zbulojmë planin popullit shqiptar, siç e premtuam”.
Rama tha se ishte “shumë i befasuar” nga reagimi i TikTok pas vendimit fillestar të Shqipërisë për të ndaluar platformën.
“Sepse në fillim, për shkak se ishte normale të mendonim se ata do të na luftonin, ata do të hakmerreshin ndaj nesh, do të na ngacmonin. I takova vetë dhe mbeta shumë i impresionuar nga qëndrimi i tyre. Ata po i dëgjonin me shumë kujdes pikat tona”, tha Rama për POLITICO në margjinat e Samitit BE-Ballkani Perëndimor.
Vendi kandidat për në BE vendosi ndalimin në mars të vitit 2025 pas rreth një viti bisedimesh me TikTok mbi abuzimin online, përfshirë dy vetëvrasje që besohet se lidhen me ngacmimin në platformë. Goditja fatale me thikë e një djali 14-vjeçar jashtë një shkolle, pas një mosmarrëveshjeje online, ishte pika e fundit dhe qeveria urdhëroi ofruesit e shërbimeve të internetit të bllokojnë aksesin në versionet e desktopit dhe të aplikacioneve.
Megjithatë, ky veprim shkaktoi reagime të ashpra nga partitë opozitare dhe OJQ-të, të cilat akuzuan qeverinë për censurë dhe për kufizimin e shprehjes politike në internet. Agron Gjekmarkaj, një deputet shqiptar nga grupi më i madh opozitar, i tha POLITICO-s më parë këtë vit se Rama po e përdorte ndalimin përpara zgjedhjeve të majit për të dobësuar praninë e opozitës në internet.
Kur u pyet nëse ndalimi ishte efektiv në frenimin e dhunës në shkolla, Rama u përgjigj: “Ka qenë efektiv në ndërtimin e kësaj marrëdhënieje me TikTok-un dhe në sjelljen e disa masave mbrojtëse që nuk ekzistonin.”
Megjithatë, raportet e mediave lokale zbulojnë se ndalimi pati pak efekt në zgjidhjen e çështjes së dhunës në shkollë ose rritjes së dhunës dixhitale.
Por, Shqipëria nuk ka gjasa të mbështesë kufizimet në përdorimin e mediave sociale nga të miturit, një temë që aktualisht është në diskutim në kryeqytete të ndryshme të BE-së dhe në Bruksel , nëse ajo anëtarësohet në union. Rama e ka vendosur vitin 2030 si objektiv për anëtarësimin në BE.“Këto janë budallallëqe.
Kjo është diçka që Shqipëria nuk do ta marrë në konsideratë. Nuk funksionon”, tha ai, duke pranuar se qeveria e tij e ka shqyrtuar, por “nëse nuk ke një zbulim të plotë se kush fshihet pas kësaj, do të jesh gjithmonë viktimë e sulmeve nga trollët dhe robotët”, tha kryeministri./ POLITICO
