Kryetari i Komunës së Mitrovicës, Faton Peci, njoftoi se i gjithë mekanizmi shtetëror në nivel lokal dhe qendror është në gjendje gatishmërie për ndërhyrje të menjëhershme, për shkak të rrezikut nga vërshimet e shkaktuara nga reshjet e vazhdueshme të shiut.
Peci bëri të ditur se sonte në orën 21:00 ka thirrur një mbledhje të jashtëzakonshme me të gjithë akterët kompetentë të zinxhirit të sigurisë dhe intervenimit emergjent, ku është diskutuar koordinimi institucional, vlerësimi i situatës në terren dhe masat për menaxhimin e gjendjes. Ai theksoi se komuna ka vënë në dispozicion të gjitha mjetet e nevojshme, ndërsa edhe ekipet vullnetare janë në gatishmëri.
Situata është përkeqësuar veçanërisht në fshatin Koshtovë, ku janë raportuar vërshime si pasojë e reshjeve intensive. Banorët kanë njoftuar ekipet emergjente dhe vullnetarët kanë dalë në terren për të ndihmuar. Sipas raportimeve nga terreni, të pranishme janë Forca e Sigurisë së Kosovës, njësitë e zjarrfikësve, si dhe kompania “Toni”, e angazhuar nga komuna për pastrimin dhe hapjen e kanaleve të ujërave.
Më herët është raportuar se lumi Lushta ka dalë nga shtrati, duke shkaktuar përmbytjen e stacionit të autobusëve në Mitrovicë.
Në fshatin Polluzhë të Rahovecit, si pasojë e vërshimeve të mëdha një pjesë e rrugës është shembur dhe është e pakalueshme.
Ndërkohë, Agjencia e Menaxhimit Emergjent (AME) ka bërë të ditur se situata me vërshime në nivel vendi paraqitet e menaxhueshme, megjithëse janë shënuar raste të lokalizuara në disa komuna, përfshirë Fushë Kosovë, Drenas, Malishevë, Rahovec, Klinë, Mitrovicë, Vushtrri, Skenderaj dhe Gjakovë. Në Gjakovë është kërkuar ndihmë për evakuimin e mbi 20 familjeve, në koordinim me FSK-në.
AME u ka bërë thirrje qytetarëve të mos kalojnë në zona të vërshuara, të raportojnë çdo rrezik në numrin 112 dhe të ndjekin vetëm njoftimet zyrtare, duke theksuar se siguria e qytetarëve mbetet prioritet.
Situata mbetet nën monitorim të vazhdueshëm, ndërsa ekipet emergjente janë në terren në disa komuna të vendit.
