Një nga felinët më të rrallë dhe më të rrezikuar në botë është filmuar sërish në natyrë në ishullin Borneo, në Malajzi. Pamjet e publikuara nga autoritetet malajziane tregojnë macen me kokë të sheshtë (Prionailurus planiceps), një specie jashtëzakonisht e rrallë e faunës së egër.
Sipas Sabah Wildlife Department dhe Sabah Forestry Department, kafsha është filmuar nga kamera-kurth në Tangkulap Forest Reserve, në rajonin Sabah. Regjistrimet janë realizuar në muajt shkurt dhe gusht 2024, por janë publikuar së fundmi nga AFP.
View this post on Instagram
Macja me kokë të sheshtë konsiderohet një nga felinët më të kërcënuar në nivel global, për shkak të humbjes së habitatit natyror, shpyllëzimit dhe ndotjes së zonave ujore, nga të cilat varet për ushqim. Ajo jeton kryesisht pranë lumenjve dhe kënetave dhe është shumë rrallë e dokumentuar në natyrë.
Ekspertët e ruajtjes së natyrës nga organizata Panthera vlerësojnë se këto pamje janë jashtëzakonisht të rëndësishme për studimin dhe mbrojtjen e species, pasi konfirmojnë praninë e saj aktive në këtë zonë të mbrojtur të Borneos.
Autoritetet malajziane theksojnë se dokumentimi i këtij felini të rrallë forcon rëndësinë e ruajtjes së pyjeve tropikale dhe ekosistemeve natyrore në Borneo, një nga zonat më të pasura në botë për biodiversitet.
