Departamenti Amerikan i Drejtësisë ka nisur publikimin e dosjeve të shumëpritura që lidhen me hetimet ndaj financierit dhe abuzuesit seksual Jeffrey Epstein, në zbatim të ligjit Epstein Files Transparency Act, pas muajsh presioni politik dhe publik.
Sipas autoriteteve amerikane, bëhet fjalë për qindra mijëra dokumente, fotografi dhe materiale hetimore të grumbulluara gjatë dy hetimeve penale ndaj Epstein, i cili u vetëvra në burg në vitin 2019, ndërsa priste gjyqin për trafikim seksual të të miturave.
Dosjet janë publikuar në katër databaza të ndara, që përfshijnë materiale nga bastisjet në rezidencat e Epstein, transkripte intervistash, dokumente gjyqësore dhe fotografi nga prona të ndryshme në SHBA dhe jashtë saj. Shumë prej materialeve janë të redaktuara, për të mbrojtur identitetin e viktimave dhe personave privatë.
Departamenti i Drejtësisë ka sqaruar se janë identifikuar mbi 1.200 viktima ose familjarë të tyre, dhe çdo informacion që mund të çojë në identifikimin e tyre është hequr ose fshehur. Gjithashtu, disa materiale nuk janë bërë publike për shkak se lidhen me hetime ende aktive ose përmbajnë imazhe abuzimi.
Në dosjet e publikuara shfaqen edhe foto dhe referenca për figura të njohura publike, përfshirë ish-presidentin Bill Clinton, Michael Jackson, Richard Branson, Chris Tucker dhe të tjerë. Autoritetet theksojnë se përfshirja e emrave apo imazheve nuk përbën provë për ndonjë vepër penale, dhe shumica e personave të përmendur kanë mohuar çdo lidhje me krimet e Epstein.
Administrata Trump e ka cilësuar publikimin si një akt transparence, ndërsa demokratët në Kongres kanë kritikuar vonesat dhe kanë paralajmëruar se do të kërkojnë publikimin e plotë të të gjitha materialeve, nëse rezulton se një pjesë e dosjeve po mbahen ende të fshehta.
Autoritetet amerikane kanë bërë të ditur se publikime të tjera të dokumenteve priten në javët në vijim, për shkak të volumit të madh të materialit.
