Ish-kryeministri Sali Berisha, gjatë një takimi me diasporën shqiptare në Napoli, deklaroi se beteja politike e 11 majit është vendimtare për të ardhmen e Shqipërisë. Ai theksoi se ndryshimi kërkon një “audit të përgjithshëm”, duke e krahasuar këtë proces me vizionin e një “Elon Musk-u shqiptar”, që mund të gjendet brenda dhe jashtë vendit.
Në fjalën e tij, Berisha theksoi rëndësinë e revolucionit teknologjik dhe fuqizimit energjetik të Shqipërisë, duke premtuar se vendi do të bëhet një superfuqi në rajon. Ai përmendi burimet e pasura natyrore të Shqipërisë dhe potencialin për prodhim të madh të energjisë diellore dhe eolike.
Ndër të tjera, ai nënvizoi se objektivi i opozitës është të ulë çmimin e energjisë elektrike, duke siguruar tarifa më të favorshme për qytetarët dhe bizneset shqiptare.
Duke iu drejtuar shqiptarëve në diasporë, Berisha i bëri thirrje që të mobilizohen për të sjellë ndryshimin në zgjedhjet e ardhshme, duke e quajtur këtë një moment historik për ndarjen nga “narkodiktatura” dhe hapjen e një epoke të re për Shqipërinë.
Ai përfundoi fjalimin me një thirrje për unitet dhe përkushtim ndaj fitores së opozitës, duke shprehur besimin se shqiptarët, brenda dhe jashtë vendit, do të bashkohen në këtë betejë për një Shqipëri më të mirë.
