Çmimet globale të ushqimeve kanë shënuar një tjetër rritje, duke rikthyer frikën për një krizë të re ushqimore në shkallë botërore. Indeksi i Çmimeve të Ushqimeve i FAO-s arriti në 128.5 pikë në muajin mars, me një rritje prej 2.4% krahasuar me shkurtin dhe 1% më shumë se një vit më parë.
Rritja është udhëhequr nga vajrat bimorë me 5.1% dhe sheqeri me 7.2%, të ndikuara nga çmimet e larta të naftës që po shtyjnë përdorimin për biokarburante dhe etanol. Edhe drithërat u rritën me 1.5%, për shkak të thatësirës në SHBA dhe kostove të larta të prodhimit, ndërsa orizi ka pësuar rënie me 3% falë ofertës më të lartë.
Sipas FAO, situata mund të përkeqësohet nëse mbyllet Ngushtica e Hormuzit, një rrugë kyçe për furnizimin me karburant dhe plehra, çka do të ndikonte drejtpërdrejt në prodhimin bujqësor global.
Agjencia paralajmëron se vendet me borxhe të larta mund të detyrohen të ulin importet e ushqimeve, duke rritur rrezikun e pasigurisë ushqimore. Në planin afatshkurtër, rekomandohen masa si sigurimi i rrugëve alternative tregtare dhe mbrojtja e furnizimeve humanitare.
Ndërkohë, edhe çmimet e mishit dhe produkteve të bulmetit janë në rritje, duke shtuar presionin mbi konsumatorët në mbarë botën.
