Një denoncim i bërë nga Enkelejd Alibeaj ka vënë në qendër të debatit Kuvendin e Shqipërisë, i cili akuzohet për përfshirje në fushatën zgjedhore në favor të Partisë Socialiste dhe kryeministrit Edi Rama.
Në denoncimin e bërë publik, Alibeaj pretendon se faqja zyrtare e Kuvendit në rrjetet sociale ka postuar një mesazh në të cilin bëhej thirrje për të votuar numrin 5 në fletën e votimit, duke e lidhur këtë me mbështetjen për PS-në dhe kandidatin e saj kryesor, Edi Ramën.
“Është e papranueshme që një institucion që duhet të jetë i paanshëm, të përdoret për propagandë politike. Ky është një abuzim flagrant me pushtetin dhe një shkelje e qartë e standardeve demokratike”, thuhet në denoncimin e Alibeajt.
Në reagimin e saj zyrtar, Zyra e Shtypit e Kuvendit mohoi çdo përfshirje të institucionit në fushatën zgjedhore, duke e cilësuar denoncimin si të pabazuar.
“Kuvendi i Shqipërisë është një institucion demokratik pluralist gjithëpërfshirës, përfaqësues i vullnetit të popullit dhe i të gjitha forcave politike.
Sqarojmë opinionin publik se shërbimet e Kuvendit, gjatë ushtrimit të detyrave të tyre, bazohen në parimet e profesionalizmit dhe paanshmërisë.
Kuvendi i Shqipërisë garanton opinionin publik se administrata dhe shërbimet, faqja dhe rrjetet sociale të tij nuk janë përfshirë dhe nuk do të përfshihen në asnjë mënyrë dhe në asnjë formë në fushatën e zgjedhjeve parlamentare.”
