Kryeministri Edi Rama ka reaguar me tone të forta lidhur me zhvillimet e fundit në Lindjen e Mesme dhe kërcënimin bërthamor që paraqet Irani, pas sulmeve ajrore të raportuara mbi objektet bërthamore iraniane.
Në një deklaratë publike, Rama e cilëson regjimin në Teheran si një “teokraci me retorikë apokaliptike”, duke theksuar se ai përbën një rrezik të paprecedentë për paqen dhe sigurinë globale.
> “Ky nuk është thjesht një tjetër shtet me kapacitete bërthamore, as një diktaturë me ambicie për të zotëruar armë të tilla. Është një teokraci, e pajisur me një retorikë apokaliptike, e ngulitur në një traditë shtatëdhjetëvjeçare të etiketimit të kombeve të lira si ‘satanike’, dhe që bën thirrje të hapura për zhdukjen e tyre,” – deklaroi Rama.
Ai shtoi se një regjim i tillë nuk mund të krahasohet me asnjë tjetër që ka në zotërim armë bërthamore, pavarësisht formës së qeverisjes së tyre.
Duke nënvizuar historinë e Shqipërisë si një vend që ka lënë pas një të kaluar të errët teokratike dhe që sot qëndron krah botës së lirë, Rama theksoi mbështetjen e palëkundur të vendit tonë për aleatët strategjikë.
> “Si një shtet që ka dalë nga errësira e një regjimi teokratik brutal, dhe një anëtar krenar i botës së lirë, Shqipëria shpreh mbështetjen e saj të palëkundur për përpjekjet e Presidentit Trump në ndalimin e regjimit teokratik në Teheran që të zotërojë armë bërthamore,” – përfundoi Rama.
Ky reagim vjen në një moment tensioni të lartë ndërkombëtar, ku bashkësia ndërkombëtare është ndarë mbi qëndrimin ndaj Iranit dhe programit të tij bërthamor.
