Kryeministri Edi Rama, në një takim me Komitetin Ekonomik dhe Social të BE-së, deklaroi se Shqipëria ka një shans real këtë vit për të hapur të gjithë grup-kapitujt e negociatave për anëtarësimin në Bashkimin Evropian — një hap që mund të përshpejtojë integrimin e vendit në BE.
Ai e quajti këtë një moment historik, ku për herë të parë “yjet tona janë në një linjë me yjet e BE-së”, dhe theksoi se Shqipëria duhet të shfrytëzojë këtë dritare mundësie përpara se “kështjella të mbyllë dyert sërish”.
Rama theksoi rolin pozitiv të BE-së në ndërtimin e institucioneve demokratike dhe shtoi se përkundër rrugëtimit të vështirë dhe shpesh të dhimbshëm, Shqipëria është në rrugën e duhur dhe po përparon me sukses.
Ai falënderoi presidentin e Komitetit, Ropke, për mbështetjen e vazhdueshme ndaj Shqipërisë dhe u shpreh me humor se vendi ynë do të ishte gjithmonë i gatshëm t’i ofronte një punë “përveç asaj të tijës”.
