Kryeministri Edi Rama e cilësoi si një hap të rëndësishëm për Shqipërinë mbajtjen e Konferencës së Tretë Ndërqeveritare mes Shqipërisë dhe Bashkimit Evropian dhe hapjen e grup-kapitullit të 6: Marrëdhëniet me Jashtë.
Në një prononcim për mediet përpara Konferencës, Rama u shpreh se, “jemi këtu për një hap të rëndësishëm dhe të hapim një grup-kapitull të ri që është shumë i rëndësishëm për planet tona”.
“Ne duhet të vazhdojmë para dhe ambicia jonë është të hapim më shumë grup-kapituj deri në pranverë dhe më pas të jemi të sigurt që vitin e ardhshëm të mbarojmë me hapjen e kapitujve”, tha Rama.
“Është ditë e mirë për vendin tonë dhe është hap motivues për të gjithë ne”, theksoi kreu i qeverisë.
Grup-kapitulli përmban dy kapituj: Kapitulli 30 – Marrëdhëniet e jashtme dhe Kapitulli 31 – Politika e jashtme, e sigurisë dhe e mbrojtjes.
Ky vendim vjen pas hapjes së kapitullit të “Themeloreve”, më 15 tetor që përfshin reformat kyçe në drejtësi, sundimin e ligjit, të drejtat themelore dhe funksionimin e institucioneve demokratike./ atsh
