Kryeministri Edi Rama shprehu kritika të forta ndaj Bashkimit Europian gjatë pjesëmarrjes së tij në Forumin e Paqes në Paris, duke vënë në pikëpyetje rolin e BE-së në ndërmjetësimin për t’i dhënë fund luftës në Ukrainë.
Rama theksoi se, sipas tij, BE ka funksionuar në autopilotin e Shteteve të Bashkuara, pa një plan të qartë europian për paqen:
“BE ka vetëm një qasje binare ndaj një konflikti që ka potencial të jashtëzakonshëm për të gjeneruar diçka katastrofike. Ende nuk ka një plan europian paqeje. BE duhet të ketë planin e paqes dhe duhet të ketë komunikimin me Rusinë dhe me këdo tjetër që gjendet në mes,” – u shpreh kryeministri.
Ai shtoi se përpjekjet e Presidentes së Komisionit Europian dhe udhëheqësve që përpiqen të avancojnë dialogun janë të fragmentarizuara dhe, sipas tij, mund të jenë të rrezikshme:
“Në shumë përpjekje që po bëhen nga Presidentja e Komisionit, nga udhëheqësit që duan t’i çojnë gjërat përpara dhe në këtë shtysë për të ndryshuar qëndrimin në idenë e mbrojtjes, sipas mendimit tim kjo është mjaft e fragmentarizuar dhe mund të bëhet e rrezikshme.”
Rama theksoi gjithashtu rëndësinë e komunikimit me të gjitha palët, duke përmendur edhe situatën me Putin dhe konfliktet rajonale:
“A donte Hamasi paqe? Nuk e besoj për një sekondë që të jetë e vërtetë. Që Putini do luftë është e qartë çdo ditë.”
Kryeministri shqiptar nënvizoi nevojën që BE të marrë një rol më aktiv dhe të qartë në negociatat për paqen, për të shmangur pasojat katastrofike të konfliktit.
