Në përfundim të mandatit të Oliver Röpke si President i Komitetit Ekonomik dhe Social Europian (EESC), Kryeministri Edi Rama mbajti një fjalim vlerësues për rolin e tij të jashtëzakonshëm në forcimin e dialogut social dhe mbrojtjen e të drejtave të punonjësve.
Rama u shpreh se përmes udhëheqjes së Röpke, komiteti ka qenë një “makineri që ka ndërtuar konsensus, fuqizuar rininë në vendimmarrje dhe ka garantuar që politikat e gjelbra dhe digjitale të mbështeten në drejtësi dhe qëndrueshmëri”.
“Në kohë të vështira, dialogu social nuk është luks, por një nevojë e domosdoshme, si oksigjen për një kontinent që mban frymën,” tha Rama, duke kujtuar periudhën e trazirave nga pandemia dhe lufta në Ukrainë gjatë presidencës së Röpke.
Kryeministri theksoi gjithashtu se Oliver Röpke ishte një mbështetës i fortë i zgjerimit të Bashkimit Europian, duke e përfshirë Shqipërinë dhe vendet e Ballkanit Perëndimor në vendimmarrje:
“Ju na bëtë pjesë të tavolinës si partnerë me zë të plotë, jo si spektatorë që shohin nga vrima e çelësit. Ju këmbëngulet që e ardhmja e Ballkanit Perëndimor është në BE.”
Rama kujtoi se nën presidencën e Röpke, Shqipëria bëri hapa historikë në procesin e integrimit:
“Vetëm dje hapëm katër kapituj të tjerë, duke kaluar një pritje që zgjati vite. Sot ndodhemi në një turbo-sprint për integrimin europian.”
Në përfundim, Rama falënderoi Röpke për vizionin dhe angazhimin e tij:
“Komiteti Ekonomik dhe Social Europian ishte vendi i parë ku ne shqiptarët u ndjemë qytetarë të barabartë të Europës. Faleminderit që na dëgjuat dhe na përfshitë si pjesë të së ardhmes së përbashkët europiane.”
View this post on Instagram
