TIRANË / HAGË – Kryeministri Edi Rama, gjatë udhëtimit të tij drejt Hagës për një takim me ish-Presidentin e Kosovës dhe ish-komandantin e UÇK-së, Hashim Thaçi, ka reaguar ashpër ndaj procesit gjyqësor që po zhvillohet ndaj tij dhe tre ish-bashkëluftëtarëve të tjerë, duke e cilësuar atë si një “teatër absurd” dhe një “farsë të drejtësisë ndërkombëtare”.
Rama u shpreh se Hashim Thaçi, i zgjedhur në mënyrë demokratike nga populli i Kosovës, “mbahet peng prej vitesh në një qeli të drejtësisë ndërkombëtare”, ndërsa akuzoi institucionet që sponsorizojnë këtë gjykatë për shkelje të rënda të standardeve, të drejtave të njeriut dhe normave të procesit të rregullt ligjor .
Sipas kryeministrit, tashmë ka përfunduar ekspozimi i provave të akuzës dhe dëshmitë e dëshmitarëve, si të akuzës ashtu edhe të mbrojtjes, ndërsa pritet vendimi përfundimtar. Ai shprehu shpresën dhe lutjen që viti i ardhshëm të shënojë fundin e këtij procesi dhe daljen nga izolimi të Thaçit dhe bashkëluftëtarëve të tij .
Rama i bëri thirrje vendeve demokratike që mbështesin këtë gjykatë të reflektojnë mbi standardet e ulëta të drejtësisë që, sipas tij, janë aplikuar në këtë rast, duke theksuar se “e vetmja e drejtë” është ajo e njerëzve që u rebeluan kundër një regjimi shtypës dhe morën armët për të mbrojtur lirinë dhe dinjitetin njerëzor .
Në të njëjtën kohë, Kryeministri Rama foli edhe për zhvillimet në Bashkimin Europian, duke vlerësuar si të suksesshëm dhe inkurajues samitin e fundit BE–Ballkani Perëndimor. Ai theksoi se Shqipëria dhe Kosova janë vlerësuar maksimalisht në Bruksel dhe veçoi rolin e Presidentes së Kosovës, e cila sipas tij “ka shkëlqyer” dhe ka ndihmuar në zhbllokimin e fondeve të BE-së për Kosovën .
Rama deklaroi se Shqipëria ndodhet në një moment historik në marrëdhëniet me Bashkimin Europian, duke ritheksuar objektivin për hapjen e të gjithë kapitujve dhe përmbylljen e negociatave brenda vitit 2027, si dhe angazhimin për vijimin e reformave dhe luftën kundër korrupsionit dhe krimit të organizuar .
