Zvicra është tronditur nga një prej tragjedive më të rënda të viteve të fundit, pasi një zjarr shkatërrues në një bar në resortin alpin Crans-Montana ka shkaktuar të paktën 40 viktima dhe 115 të plagosur, sipas autoriteteve zvicerane .
Zjarri shpërtheu rreth orës 01:30 me orën lokale në lokalin Le Constellation, gjatë festimeve të ndërrimit të viteve, në një ambient ku ndodheshin kryesisht të rinj dhe familjarë që po festonin hyrjen e vitit 2026. Rreth 60 persona po trajtohen në spitalin e Sionit, ndërsa dhjetëra të tjerë janë dërguar në spitale të ndryshme brenda dhe jashtë Zvicrës, shumë prej tyre në gjendje kritike .
Autoritetet kanë bërë të qartë se ngjarja nuk po trajtohet si sulm, ndërsa shkaku i saktë i zjarrit mbetet ende nën hetim. Dëshmitarë okularë kanë deklaruar se flakët mund të jenë ndezur nga qirinj feste ose fishekë të vendosur mbi shishe shampanje, por prokuroria zvicerane nuk ka konfirmuar ende këtë pistë .
Në operacionin e emergjencës janë angazhuar dhjetëra ambulanca, helikopterë dhe qindra punonjës shpëtimi, ndërsa procesi i identifikimit të viktimave pritet të zgjasë për shkak të djegieve të rënda. Presidenti i Zvicrës, Guy Parmelin, e cilësoi ngjarjen si “një nga tragjeditë më të rënda që ka përjetuar vendi” .
Ndërkohë, në Crans-Montana janë mbajtur homazhe dhe vigjilje përkujtimore, ku qytetarë dhe familjarë kanë vendosur qirinj dhe lule në nderim të viktimave. Bashkimi Evropian, Franca dhe Italia kanë ofruar ndihmë mjekësore dhe mbështetje për autoritetet zvicerane në përballimin e pasojave të tragjedisë.
