Në mbledhjen e zhvilluar sot, Këshilli i Ministrave miratoi një shtesë fondi prej 150 milionë lekësh në programin “Mbështetje për partitë politike”, që do të përdoret për financimin e fushatës zgjedhore të subjekteve pjesëmarrëse në zgjedhjet për Kuvendin e Shqipërisë, të cilat do të mbahen më 11 maj 2025.
Vendimi i qeverisë bazohet në dispozitat e Kushtetutës, Kodit Zgjedhor dhe legjislacionit në fuqi për menaxhimin e buxhetit. Fondi do të shpërndahet nga Komisioni Qendror i Zgjedhjeve (KQZ) për të gjitha subjektet zgjedhore që garojnë në këto zgjedhje.
Sipas vendimit, efekti financiar përballohet nga fonda rezervë e Këshillit të Ministrave, e parashikuar për raste të paparashikuara për vitin 2025.
Në zbatim të vendimit janë ngarkuar Ministria e Financave dhe Komisioni Qendror i Zgjedhjeve, ndërsa vendimi hyn në fuqi menjëherë dhe do të publikohet në Fletoren Zyrtare.
Ky financim synon të garantojë një fushatë zgjedhore transparente dhe të barabartë për të gjitha forcat politike që do të marrin pjesë në zgjedhjet parlamentare të 11 majit.
