Pas mbylljes së hetimeve të nisura që në vitin 2019, SPAK ka dërguar për gjykim në Gjykatën e Posaçme ish-presidentin Ilir Meta, ish-bashkëshorten e tij Monika Kryemadhi, si dhe tre persona të tjerë, të akuzuar për korrupsion, pastrim parash dhe fshehje pasurie.
Sipas SPAK, Meta dhe Kryemadhi kanë përdorur pushtetin për të favorizuar biznese të caktuara në këmbim të shpërblimeve, ndërsa hetimet kanë zbuluar skema të shumta korruptive dhe mosdeklarim pasurish.
Avokati Romeo Kara, i ftuar në “Ora e Fundit”, tha se akuzat ndaj Metës janë të mbështetura me prova të forta:
“Meta rrezikon 12-15 vite burg, ose 8-12 vite me gjykim të shkurtuar. Drejtësia duhet t’u sekuestrojë pasuritë për të dhënë një mesazh të fortë për të gjithë zyrtarët”.
Të akuzuarit sipas SPAK:
- Ilir Meta – korrupsion pasiv në 3 raste, pastrim parash, fshehje pasurie
- Monika Kryemadhi – korrupsion pasiv në 2 raste, pastrim parash, fshehje pasurie
- Pirro Xhixho – korrupsion pasiv
- Ema Çoku – pastrim parash
- Fatime Kryemadhi – pastrim parash
Hetimi, i zhvilluar me bashkëpunimin e autoriteteve të SHBA, Austrisë, Italisë, San Marinos dhe Qipros, ka zbuluar përdorim të pushtetit politik për përfitime financiare dhe pastrim të produkteve të veprave penale.
Procesi i gjykimit paraprak pritet të zgjasë disa muaj, ndërsa rreziku për dënime të rënda dhe sekuestrim pasurish mbetet i lartë për të pandehurit.
