Kryetari i Komisionit Qendror të Zgjedhjeve (KQZ), Ilirjan Celibashi, ka dhënë detaje mbi procesin e votimit nga diaspora për zgjedhjet e ardhshme në Euronews Albania.
Sipas Celibashit, zarfat me fletët e votimit për shqiptarët që ndodhen në Shtetet e Bashkuara të Amerikës dhe Kanada do të marrin nga 3 deri në 5 ditë për të mbërritur në destinacion.
Ai theksoi se afati i fundit që fletët e votimit të diasporës të mbërrijnë në KQZ është 7 ose maksimumi 8 prilli. Procesi i dërgimit të fletëve të votimit do të nisë nga data 8 prill deri më 17 prill, me prioritet për vendet jashtë Europës. Celibashi nënvizoi se deri në 17 prill duhet të ketë përfunduar plotësisht dërgimi i zarfeve për votuesit shqiptarë jashtë vendit.
Për sa i përket përgatitjes së zarfeve, Celibashi sqaroi se ky proces do të zhvillohet nën vëzhgimin e partive politike dhe do të transmetohet drejtpërdrejt për diasporën, nëse kjo e fundit dëshiron ta ndjekë për më shumë transparencë.
Ai bëri të ditur se rreth 65 persona do të angazhohen në këtë proces, duke punuar nga ora 08:00 e mëngjesit deri në mesnatë për një periudhë 10-ditore. Testet kanë treguar se përgatitja e një zarfi kërkon rreth 3-4 minuta.
Gjithashtu, Celibashi informoi se procesi do të zhvillohet në Pallatin e Sportit, ku do të organizohet edhe shpërndarja e fletëve të votimit sipas qarqeve.
KQZ ka theksuar rëndësinë e transparencës në këtë proces dhe angazhimin për të garantuar një votim të rregullt dhe të besueshëm për qytetarët shqiptarë që jetojnë jashtë vendit duke përfshirë tri zarfe në procedurë që ruajnë fshehtësinë e votës.
Celibashi demonstroi në studio live se si hapet zarfi, dhe si futet në zar fletëvotimi pasi e ke plotësuar.
Celibashi thotë se DHL do t’i lërë një kontakt votuesit jashtë, nëse nuk e gjen në shtëpi pas tre tentativash. Do t’i caktojë një afat për tërheqje në zyrën postare, duke paraqitur një dokument identifikimi. Për shembull, ky afat mund të jetë tre ditë, pasi nuk mund të presim pafundësisht. Secili anëtar i familjes e merr në dorëzim individualisht. Po ashtu, për dorëzimin në kthim, duhet të jetë vetë personi si në pranim. Fleta e votimit duhet të plotësohet brenda 3 ditëve dhe të dërgohet, thotë kryekomisioneri shtetëror i zgjedhjeve.
