Një incident i paprecedentë ka ndodhur mbrëmjen e 9 shtatorit, kur mbi dhjetë dronë rusë kaluan në hapësirën ajrore të Polonisë gjatë një sulmi masiv rus mbi Ukrainën perëndimore. Autoritetet polake e kanë cilësuar ngjarjen si një “akt agresioni”, duke ngritur në ajër avionë luftarakë dhe duke aktivizuar mbrojtjen ajrore të NATO-s.
Forcat polake kanë rrëzuar disa prej dronëve që përbënin rrezik të drejtpërdrejtë, ndërsa njësitë ushtarake janë angazhuar në kërkimin e mbetjeve të tyre. Për shkak të alarmit, u mbyllën përkohësisht katër aeroporte kryesore, përfshirë atë të Varshavës, duke shkaktuar ndërprerje të trafikut ajror.
Qytetarët në rajonet Podlaskie, Mazowieckie dhe Lublin u urdhëruan të qëndrojnë në ambiente të sigurta deri në qetësimin e situatës.
Kryeministri Donald Tusk thirri menjëherë një mbledhje urgjente të qeverisë dhe njoftoi koordinim të ngushtë me udhëheqësit e NATO-s. Ky është rasti i parë kur Polonia, një vend anëtar i Aleancës, rrëzon drejtpërdrejt dronë rusë në territorin e saj.
Ngjarja përkon me zhvillimin e stërvitjes së përbashkët ushtarake ruso-bjelloruse “Zapad 2025” pranë kufirit me NATO-n, gjë që ka shtuar shqetësimet për një përshkallëzim të ri të konfliktit.
Zyrtarë amerikanë dhe europianë e kanë cilësuar incidentin si shkelje serioze të sovranitetit dhe disa ligjvënës në SHBA e kanë quajtur atë një akt lufte. Polonia ndërkohë ka shpallur mbylljen e kufirit me Bjellorusinë dhe ka rritur nivelin e gatishmërisë ushtarake.
