Andriy Parubiy, ish-kreu i Parlamentit të Ukrainës dhe një figurë e shquar e lëvizjes Maidan, është qëlluar për vdekje në qytetin e Lviv në Ukrainë, kanë njoftuar autoritetet ukrainase. Ngjarja ka ndodhur në distriktin Frankivsk rreth mesditës të shtunën, ndërsa është ende e paqartë nëse autori është arrestuar.
Parubiy, 54 vjeç, ishte një nga liderët më të njohur të lëvizjes pro-perëndimore që rrëzoi ish-presidentin pro-rus, Viktor Yanukovych, në vitin 2014. Ai luajti një rol kyç në përpjekjet e Ukrainës për të forcuar lidhjet me Bashkimin Evropian dhe është bërë një nga figurat më të rëndësishme të politikës ukrainase.
Në një reagim të tij, Presidenti ukrainas Volodymyr Zelensky e cilësoi këtë ngjarje si një “vrasje të tmerrshme” dhe shprehu ngushëllime për familjen dhe miqtë e Parubiy.
Raportet jo të konfirmuara sugjerojnë se Parubiy u qëllua disa herë nga një person me motor elektrik, i cili ishte veshur si shpërndarës. Hetimet janë duke u zhvilluar nga policia kombëtare e Ukrainës, policia e Lvivit dhe shërbimi i sigurisë ukrainas për të zbardhur detajet dhe për të identifikuar autorin e krimit.
Në një njoftim të shpërndarë në Telegram, Zelensky tha: “Ministri i Punëve të Brendshme të Ukrainës Ihor Klymenko dhe Prokurori i Përgjithshëm Ruslan Kravchenko sapo më raportuan për rrethana të para të vrasjes së tmerrshme në Lviv. Andriy Parubiy u vra. Ngushëllime për familjen dhe miqtë e tij. Po përdoren të gjitha forcat dhe mjetet për hetimin e ngjarjes dhe gjetjen e vrasësit.”
Ngjarja po hetohet me urgjencë nga autoritetet për të zbardhur shkakun dhe autorin e sulmit.
