Pas bllokimit të një ngarkese me pjeshkë nga Shqipëria në Kroaci dhe Bosnjë-Hercegovinë, për shkak të pranisë së nikelit mbi normat e lejuara, ka reaguar Autoriteti Kombëtar i Ushqimit (AKU).
Ngjarja u bë publike më 21 gusht, kur autoritetet kroate, përmes sistemit evropian të sigurisë ushqimore RASFF, njoftuan për ndalimin e një ngarkese me 5,562 kg pjeshkë me origjinë nga Shqipëria, për shkak të tejkalimit të kufirit të lejuar të përmbajtjes së nikelit. Rasti u klasifikua si “Njoftim për refuzim në kufi”, me referencë nr. 2025.6367.
Sipas njoftimit të Autoritetit Kombëtar të Ushqimit (AKU), menjëherë pas marrjes së alarmit nga autoritetet kroate, është kryer një inspektim në subjektin eksportues në Fier, ku rezultoi se produkti nuk ishte më në magazinë dhe se e gjithë sasia ishte eksportuar, pa hyrë në tregun vendas.
“Subjekti disponon një sistem gjurmueshmërie dhe, nga verifikimi, rezultoi se produkti nuk është shpërndarë në Shqipëri. Ngarkesa është asgjësuar në Kroaci pas rezultateve laboratorike”, thuhet në deklaratën zyrtare të AKU-së.
Autoriteti bën të ditur gjithashtu se rasti është referuar për ndjekje të mëtejshme në Autoritetin Kombëtar të Veterinarisë dhe Mbrojtjes së Bimëve (AKVMB), për të marrë masat e nevojshme në përputhje me legjislacionin në fuqi.
AKU ka përditësuar njoftimet përkatëse në sistemin RASFF dhe po vijon bashkëpunimin me autoritetet evropiane për të garantuar sigurinë e zinxhirit ushqimor.
Njoftim nga Ministria e Bujqesise
Më datë 22.08.2025, Shqipëria është njoftuar nga Sistemi RASFF, në kategorinë Njoftim për refuzim në kufi me numër reference 2025.6367 me temë: “Nikel në pjeshkë me origjinë nga Shqipëria”, të njoftuar nga Kroacia.
Nga analizat e kryera në shtetin kroat, është konstatuar prania Nikel mbi normën e lejuar.
Menjëherë pas marrjes së njoftimit, rasti i kaloi për ndjekje strukturave të Drejtorisë Rajonale të AKU Fier.
U krye inspektim në OBU eksportues, ku rezultoi se nuk ka gjendje të produktit në magazinat e tij.
Subjekti disponon sistem gjurmueshmërie, ku u verifikua se produkti është dërguar i gjithi për eksport dhe nuk është shpërndarë në tregun vendas.
Sasia prej 5562 kg pjeshkë janë dërguar drejt Kroacisë, ku dhe janë asgjëuar pas rezultatit të analizës laboratorike. Rasti iu referua dhe AKVMB për masa të mëtejshme.
AKU ka bërë edhe njoftimin përkatës mbi rezultatet e verifikimeve në kategorinë e njoftimeve RASFF.
