Në fillim të muajit mars, Shqipëria u përball sërish me gripin e shpendëve. Dy stabilimente të rëndësishme të tregut shqiptar, që operojnë në qarkun e Durrësit deklaruan se kanë patur një numër të madh ngordhjesh nga kjo sëmundje.
Por ku përfunduan këto shpendë, që do të konsumoheshin nga familjet shqiptare dhe a u zbatua ligji për veterinarinë, i cili thotë që dy metodat e asgjësimit janë groposja ose djegia. Për këtë pyetëm Ministrinë e Bujqësisë e cila na u përgjigj se asgjesimi i këtyre pulave të ngordhura është bërë nga kompanitë: Inca shpk, në pronësi të Enio Zusi, një nga ndotëset më të mëdha të mjedisit në zonën e Lezhës që e kemi denoncuar sezonin e shkuar, dhe A.Z Rendering, që jo edhe aq rastësisht, është në pronësi të Alban Zusit, babait të pronarit të Incës.
Por në rastin e INCA jemi përpara një absurdi, sepse pavarësisht se është e pezulluar nga Ministria e Mjedisit për shkak të ndotjes që shkakton, Ministria e Bujqësisë nuk ka hezituar aspak ta kontraktojë për të asgjësuar shpendët të ngordhur.
Të paktën kështu pretendojnë drejtuesit e stabilimenteve të shpendëve.
Por nuk është ky problemi i vetëm në këtë aferë. Një paqartësi tjetër po aq e rëndësishme ka të bëjë me metodën e përzgjedhur për asgjesimin e këtyre shpendëve.
Nga dy pronarët babë e bir nuk morëm asnjë përgjigje për mënyrën e asgjësimit, prandaj iu drejtuam zyrtarisht Ministrisë së Bujqësisë, e cila na sqaroi se metoda e përdorur për asgjesimin e pulave të ngordhura është e bazuar në urdhrin 411, Për Miratimin e Planit të Kontigjencës për sëmundjen e gripit të shpendëve, i cili thotë: “Trajtimi i mbeturinave, plehut, kadavrave, vezëve, puplave, kryhet në bazë të ligjit 10465, për shërbimin veterinar, në të cilin pasqyrohen vetëm dy metoda: groposje ose djegie. Por si ka ndodhur në realitet?
“I kemi bërë me rendering, kështu ka dalë urdhri nga ministria”-deklaruan drejtuesit e pularive.
Për ata që se dinë, metoda Rendering është grirja apo bluarja e kafshëve të ngordhura, dhe më pas autoklavimi i tyre.
Po nga doli vallë kjo metodë?
“ Eshtë bërë me Rendering sipas urdhrit”-sqaroi Sulejman Kullolli, drejtori i Veterinarisë.
Është e paqartë ajo që thotë zoti Kullolli, sepse kjo metodë nuk pasqyrohet aspak në urdhërin e vitit 2022, në të cilin thuhet se bazuar në ligj, duhet bërë groposje, ose djegie. Duket qartë që Ministria e Bujqësisë edhe vetë është konfuze lidhur me urdhërat që lëshon vetë. Drejtori i Veterinarisë Tiranë shtoi gjithashtu se operatorët e asgjesimit të shpendëve të ngodhur janë zgjedhur nga drejtuesit e pularive, deklaratë që është kundërshtuar kategorikisht nga këta të fundit.
Teksa ende jemi të paqartë për metodën e përzgjedhur për asgjesimin e pulave, ka mbetur edhe një element tjetër, tepër i rëndësishmë pa u sqaruar.
Ku përfunduan vezët e pulave të sëmura?
“I kemi në magazinë, të bllokuara, deri sa Ministria të gjejë vendin ku t’i çojmë” –qartësojnë stabilimentet.
Edhe këtu një tjetër kontradiktë, sepse pas një pyetje të analistit Enton Abilekaj, ministrja e Bujqësisë Anila Denaj do të deklaronte asgjësimin e 1 milion vezëve.
Lidhur me gjithë këto paqartësi, Piranjat pyetën drejtpërdrejtë Anila Denaj, ministren e Bujqësisë, por ajo nuk dha asnjë përgjigje.
Por pyetjet mbeten ende me fuqi, me shpresën se një ditë do të marrin përgjigjen e qartë.
© SYRI.net
