15 Janar 2026 — Departamenti Amerikan i Shtetit ka njoftuar pezullimin e përkohshëm të lëshimit të vizave emigruese për shtetasit e 75 vendeve, mes tyre edhe Shqipëria, në kuadër të një rishikimi të gjerë të politikave të imigracionit të administratës amerikane.
Sipas njoftimit zyrtar, masa hyn në fuqi më 21 janar 2026 dhe lidhet me shqetësimet mbi përdorimin e përfitimeve publike nga emigrantët, duke theksuar se emigrantët duhet të jenë financiarisht të vetë-mjaftueshëm dhe të mos përbëjnë barrë për taksapaguesit amerikanë.
“Presidenti Trump ka bërë të qartë se emigrantët duhet të jenë financiarisht të vetë-mjaftueshëm dhe të mos përbëjnë barrë financiare për amerikanët”, thuhet në deklaratën e Departamentit të Shtetit.
Çfarë do të pezullohet
Nga data 21 janar, nuk do të lëshohet asnjë vizë emigruese për aplikantët që janë shtetas të vendeve të listuara, përfshirë Shqipërinë, Kosovën, Bosnje dhe Hercegovinën, Maqedoninë e Veriut, Malin e Zi, si dhe dhjetëra shtete të tjera në Evropë, Afrikë, Azi dhe Amerikën Latine.
Megjithatë, aplikimet dhe intervistat për vizë do të vijojnë, por pa përfunduar me lëshimin e vizës gjatë periudhës së pezullimit.
Çfarë nuk preket
Departamenti Amerikan i Shtetit sqaron se:
- Vizat turistike, studentore dhe vizat e tjera jo-emigruese nuk preken
- Asnjë vizë emigruese e vlefshme nuk është hequr
- Personat me dyshtetësi, që aplikojnë me pasaportë të një vendi jo të përfshirë në listë, përjashtohen nga pezullimi
Për çështjet që lidhen me hyrjen në territorin amerikan, autoritetet u referohen procedurave të Departamentit të Sigurisë Kombëtare të SHBA-ve.
Arsyeja e vendimit
Vendimi është pjesë e një rishikimi të plotë të politikave, rregulloreve dhe udhëzimeve të imigracionit, me qëllim kufizimin e abuzimeve me sistemin e përfitimeve publike në Shtetet e Bashkuara.
