Pas Dibrës, radhën për reagime e ka pasur Fieri, qark ku Belinda Balluku është deputete dhe drejtuese politike e Partisë Socialiste. Menjëherë pas vendimit të Gjykatës Kushtetuese për rikthimin e saj në detyrë, në qendër të qytetit janë shënuar momente festimi.
Banorë të ndryshëm kanë shpërthyer në fishekzjarrë, duke shprehur gëzimin për vendimin e Kushtetueses që rikthen Ballukun si zëvendëskryeministre dhe ministre të Infrastrukturës dhe Energjisë.
Belinda Balluku udhëhoqi Partinë Socialiste në zgjedhjet e 11 majit në qarkun e Fierit, ku PS arriti një rezultat historik me 12 mandate, një nga performancat më të forta elektorale të kësaj force politike në nivel kombëtar.
Kushtetuesja rrëzon pezullimin e GJKKO-së
Gjykata Kushtetuese, me 5 vota pro dhe 3 kundër, ka vendosur rikthimin në detyrë të Belinda Ballukut, duke pezulluar efektet e vendimeve të GJKKO-së që kishin caktuar masën ndaluese të pezullimit nga funksioni publik.
Vendimi u mor pas shqyrtimit paraprak të kërkesës së depozituar nga Kryeministri i Republikës së Shqipërisë, për zgjidhjen e konfliktit të kompetencave mes Kryeministrisë dhe Gjykatës së Posaçme, lidhur me pezullimin e një anëtari të Këshillit të Ministrave.
Sipas njoftimit zyrtar, Gjykata Kushtetuese vendosi:
- kalimin e çështjes për shqyrtim në seancë plenare publike, për shkak të interesit të lartë publik;
- thirrjen si palë të interesuara të SPAK, GJKKO, Kuvendit të Shqipërisë dhe Presidentit të Republikës;
- pezullimin e zbatimit të vendimeve gjyqësore të GJKKO-së për masën “pezullim nga ushtrimi i një detyre a shërbimi publik” ndaj Belinda Ballukut, deri në përfundimin e gjykimit kushtetues.
Gjykata thekson se çështja lidhet me interpretimin e nenit 103 të Kushtetutës, mbi garancitë procedurale dhe imunitetin e anëtarëve të Këshillit të Ministrave.
Vendimi i pezullimit do të dërgohet për botim në Fletoren Zyrtare, ndërsa seanca plenare për shqyrtimin në themel të çështjes pritet të zhvillohet në vijim.
