Presidenti i Shteteve të Bashkuara, Donald Trump, deklaroi se “gjërat po qetësohen realisht” në arenën ndërkombëtare, teksa mori pjesë në ceremoninë e firmosjes së Kartës së Bordit të Paqes, në kuadër të Forumit Ekonomik Botëror në Davos.
“Vetëm një vit më parë bota ishte në flakë dhe shumë njerëz nuk e kuptonin këtë”, tha Trump përpara liderëve botërorë, duke përsëritur pretendimin se administrata e tij ka kontribuar në përfundimin e tetë konflikteve ndërkombëtare.
Në ceremoninë e firmosjes, dokumentet u nënshkruan nga disa liderë shtetërorë, mes tyre Presidenti i Argjentinës Javier Milei, Kryeministri i Hungarisë Viktor Orban, si edhe përfaqësues nga Azerbajxhani, Indonezia, Katari dhe Kosova.
Trump e cilësoi Bordin e Paqes si një strukturë me potencial të jashtëzakonshëm global.
“Ky mund të jetë një nga organizmat më pasojmë të krijuar ndonjëherë. Jam i nderuar të jem kryetar i tij”, deklaroi ai, duke shtuar se “pothuajse çdo vend dëshiron të jetë pjesë”.
Sipas Trump, Bordi i Paqes do të punojë paralelisht me Kombet e Bashkuara, pavarësisht kritikave të tij të mëparshme ndaj OKB-së.
“Ka potencial të jashtëzakonshëm te Kombet e Bashkuara. Bashkimi i përpjekjeve tona është diçka unike për botën”, tha presidenti amerikan.
Ndërkohë, një draft i rrjedhur i Kartës ka ngritur pikëpyetje mbi rolin e Bordit të Paqes, pasi sugjeron se struktura e re mund të synojë të zëvendësojë disa funksione të OKB-së. Dokumenti parashikon që organizata të hyjë në fuqi pasi të ratifikohet nga të paktën tre shtete dhe që vendet kontribuuese me mbi 1 miliard dollarë të kenë vende të përhershme.
Në zhvillime paralele, Trump deklaroi se SHBA po eksploron një marrëveshje afatgjatë për Groenlandën, pas bisedimeve me NATO-n, ndërsa njoftoi se ka hequr dorë nga tarifat e planifikuara ndaj tetë vendeve evropiane që kundërshtuan planet e tij për ishullin.
Sekretari i Përgjithshëm i NATO-s, Mark Rutte, sqaroi se në takimin me Trump nuk është diskutuar sovraniteti danez mbi Groenlandën. Ndërsa Kryeministrja e Danimarkës, Mette Frederiksen, deklaroi prerë:
“Mund të negociojmë për sigurinë, investimet dhe ekonominë, por jo për sovranitetin”.
Ceremonia dhe deklaratat e Trump po ndiqen live nga dhjetëra mijëra shikues, ndërsa debati mbi rolin dhe mandatin real të Bordit të Paqes pritet të vijojë edhe në ditët në vijim.
